Երեւան քաղաքի ընդհանուր իրավասության քրեական դատարանի «Շենգավիթ» նստավայրում դատավոր Արտուշ Գաբրիելյանի նախագահությամբ կայացավ Սասնա Ծռերի գործով հերթական դատական նիստը:
Դատարանը հրապարակեց հրավիրված վեց տուժողների դիրքորոշումը, որոնք հրաժարվում են գալ դատարան եւ ցուցմունք տալ, սակայն դեմ չեն, որպեսզի Սասնա Ծռերի նկատմամբ համաներում կիրառվի: «Մենք ունենք մոտավորապես 25 այդպիսի տուժողներ, որոնցից 12-13-ը փաստորեն իրենց ցանկությունն արդեն արտահայտել են, որ չեն առարկում համաներում կիրառելուն: Եթե մյուսներն էլ դեմ չլինեն, որ համաներումը կիրառվի, պետք է այս գործի վարույթը կարճվի եւ քրեական հետապնդումը դադարեցվի»,-Aravot.am-ին ասաց փաստաբան Տիգրան Հայրապետյանը:
Դրանից հետո Բեւեռի խորհրդի անդամ եւ այս գործով անցնող Կարո Եղնուկյանի փաստաբան Տիգրան Հայրապետյանը հրատապության կարգով միջնորդություն ներկայացրեց: Կարո Եղնուկյանը առողջական շատ լուրջ խնդիրներ ունի եւ շտապ վիրահատության անհրաժեշտություն կա. աջ խնձորակը պետք է պրոթեզավորվի: Հնարավոր մյուս բոլոր բժշկական միջոցառումները՝ ներարկումներ, բլոկադա եւ այլն, այլեւս օգուտ չեն տալիս:
Փաստաբանը դատարանին միջնորդեց. ա/ վերացնել պարոն Եղնուկյանի անշարժ գույքի եւ դրամական միջոցների վրա դրված կալանքը, որպեսզի իր պաշտպանյալը կարողանա սեփական միջոցներով, իսկ նա այդպիսի հնարավորություն ունի, կազմակերպել իր վիրահատությունն ու բուժումը, բ/ Կարո Եղնուկյանը ԱՄՆ քաղաքացի է, այնտեղից ստանում է բարձր թոշակ, ունի բարձր ապահովագրություն եւ ԱՄՆ-ում նրա վիրահատությունը, հետվիրահատական հսկողությունն ու դեղորայքը անվճար է: Սակայն նրան արգելված է սահման հատելը, ինչը վերացնելու դեպքում նա կկարողանա մեկնել, վիրահատվել եւ վերադառնալ, գ/ եթե այս երկու միջնորդությունները մերժվեն, ապա դատարանը միջոցներ ձեռնարկի, որպեսզի Կարո Եղնուկյանի վիրահատությունը կատարվի Հայաստանում, պետպատվերով:
Կարդացեք նաև
Դատարանը մերժեց բոլոր միջնորդությունները՝ փաստաբանի գնահատմամբ՝ անհիմն:
Հաջորդ դատական նիստը նշանակվեց դեկտեմբերի 5-ին, ժամը 11:30-ին:
Աշոտ ՀԱԿՈԲՅԱՆ
