«Ընդհանրապես մանդատը թողնելու քննարկում չի եղել, բայց երբ որ խմբակցությունից մի պատգամավոր կարծիքներ է ասում, որը խմբակցության մոտեցմանը հակառակ է, իհարկե պետք է քննարկման առարկա դառնա: Եթե համաձայն չէ, կարծիքը փոխել է, ինքը ի վիճակի է նաեւ լքել խմբակցությունը կամ խմբակցությունն իրավունք ունի որոշ պրոցեդուրաներից հետո ուղղակի հեռացնել խմբակցությունից»,- այսօր լրագրողների հետ զրույցում ասաց ՀՀ 2-րդ նախագահ Ռոբերտ Քոչարյանը՝ անդրադառնալով «Հայաստան» խմբակցության պատգամավոր Գեղամ Նազարյանի հայտարարությանը, թե Նիկոլ Փաշինյանին հեռացնելու օրակարգ չկա: Նա ասաց, որ այդ հարցի շուրջ առաջիկայում խմբակցությունում ճիշտ լուծում կտան:
Քոչարյանը անդրադառնալով Գյումրիում սպասվող ավագանու արտահերթ ընտրություններին՝ նկատեց, որ ստեղծվել է արհեստական ճգնաժամ. «Հանկարծ ավագանու անդամների կեսը ինչ-որ մի վիրուսից հիվանդացել են, չգիտեմ՝ այդ վիրուսի անունն ինչ է կամ ինչ կարգի sms-ներ են ստացել, հանկարծ սաղ հրաժարվեցին, ու ստացվեց արհեստական ճգնաժամ: Հիմա էլ փրայմերիզ են անում պաշտոնակատարի համար, փրայմերիզ անում են ներկուսակցական ընտրություններին մասնակցելու համար, հիմա պաշտոնակատարի համար, սա նորամուծություն է, ապրենք կտեսնենք»:
Արփինե ՍԻՄՈՆՅԱՆ
