Չնայած եղանակային պայմաններին՝ «Գոյի» անձնակազմը շարունակում է նստացույցն իրենց թատրոնի փակված դռան առջեւ: Երեկ նրանց այցելել է նաեւ այս օրերին Երեւանում գտնվող ֆրանսահայ աշխարհահռչակ դերասան, դրամատուրգ, թատրոնի ռեժիսոր Սիմոն Աբգարյանը եւ ծանոթացել «Գոյի» շուրջ ստեղծված խնդիրներին ու հայտնել իր մտահոգությունները։
«Ցավ եմ հայտնում, որ այսօր դեռեւս «Գոյ» թատրոնի նստացույցը շարունակվում է, այսինքն՝ իրավական տիրույթում դեռեւս շոշափելի արդյունք չկա, եւ բաղձալի միջանկյալ լուծումը չի ստացվում, որպեսզի յուրաքանչյուրն իր տեղում գործունեությունը ծավալի: Ու փաստացի իմ գործընկերները ստիպված են այս եղանակային վատթար պայմաններում շարունակել իրենց նստացույցը:
2023թ հունիսից ստանձնել եմ իմ վստահորդների շահերի ներկայացումը, և, ըստ էության, դատարաններում, իրավապահ մարմիններում ունենք արդեն բազմաթիվ ճյուղավորված գործեր, որոնք դեռեւս որեւէ ելակետային վիճակի չեն հասել»,- ասուլիսում նշեց փաստաբան Կարո Ասատրյանը՝ խոսելով «Գոյ» թատրոնի հետ կապված վերջին զարգացումների մասին:
Կարդացեք նաև
«2023թ հունիսից դատարանում վիճարկել ենք կառավարության հայտնի որոշումը, որից բխող գործողություններն ինքնին կասեցված են եղել վարչական դատավարության օրենսգրքով սահմանված կարգով, ու որի արդյունքում առնվազն մինչեւ 2023թ դեկտեմբեր ամիսը դատական պրոցեսների ֆոնի ներքո «Գոյ» թատրոնն իր գոյությունը շարունակել է: Այսինքն՝ կար կառավարության որոշում, որը վիճարկել ենք, եւ կասեցված լինելու հանգամանքներում այդ գործունեությունը շարունակվել է: 2023թ հոկտեմբերից սկսած՝ ԿԳՄՍ նախարարությունը, սակայն, որդեգրեց մի քաղաքականություն, որ այլեւս չի սպասելու դատարանների որոշմանը, եւ մեկնաբանելով օրենսդրական նորմերը՝ փաստացի իր գործողությունները կատարեց, որոնք մեր համոզմամբ բերեցին իրավունքների ոտնահարման, արդյունքում՝ մենք եւս մի քանի հայց ավելացրինք:
Հիմա, եթե խոսքը վերաբերվում է դատական գործընթացին, պատկերացնենք հետեւյալը. երբ մենք ասում ենք, որ կառավարության որոշումը պետք է անվավեր ճանաչել, որովհետեւ թե ընթացակարգային, թե իր բնույթով, թե ձեւով եւ թե նյութաիրավական նորմերի պահանջներով հակասում է օրենսդրությանը, եւ ընդունվել է օրենքի սխալ մեկնաբանման հետեւանքով, փաստացի այդ գործն ըստ էության քննվելու փոխարեն ստացվում է, որ մինչեւ այսօր դեռ որոշում են, թե որ դատարանը պետք է քննի եւ ինչ կազմով: Այսինքն, մենք տարիուկես դատական համակարգում ունենք մի իրավիճակ (իսկ մենք խոսում ենք ողջամիտ դատաքննության ժամկետների մասին), որ առարկայական մեր բարձրացված հարցերն ու խնդիրները որեւէ ձեւով չեն շոշափվել որեւէ մեկի կողմից»:
Գոհար ՀԱԿՈԲՅԱՆ
