Aravot.am-ի տեղեկություններով՝ մամուլում Երեւանի փոխքաղաքապետ Արմեն Փամբուխչյանի վարորդի անվան հետ կապվող մեքենաների հրկիզման հիմնավոր կասկածի հիմքով կա ձերբակալված անձ: Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 264-րդ հոդվածի 2-րդ մասի 2-րդ կետի հատկանիշներով (գույքը ոչնչացնել հրկիզման եղանակով):
Արմեն Փամբուխչյանի կինը՝ Սոսէ Բաղդասարյանը Aravot.am-ի հետ զրույցում վստահեցրեց, որ հրկիզված մեքենաների հետ իրենք կապ չունեն: Նրա խոսքով, մեքենաները եղել են Արմեն Փամբուխչյանի վարորդի ու վերջինիս մոր անունով, պատկանել են վարորդի ազգականին. «Բոլոր հնարավոր տարբերակներով կարող են ճշտել, տեսնել, որ մենք այդ մեքենաների հետ կապ չունենք: Մենք ունենք մի մեքենա, որը ես եմ վարում ու որի մասին հստակ նշված է մեր հայտարարագրում»:
Հիշեցնենք, որ ըստ մամուլի հրապարակումների, նոյեմբերի 24-ին հրդեհ էր բռնկվել Նոր Արեշ 44 փողոցի տներից մեկի առաջին հարկում գտնվող ավտոտնակում, որտեղ կայանված 2 «Lexus» մակնիշի ավտոմեքենաներից մեկը ամբողջությամբ այրվել էր, մյուսը շարքից դուրս եկել:
Կարդացեք նաև
Ի դեպ, Արմեն Փամբուխչյանը ֆեյսբուքյան իր էջում անդրադարձել է նշյալ թեմային.
«Սիրելի՛ երևանցիներ,
Սիրելի՛ հայրենակիցներ
ԶԼՄ ներկայացուցիչներ,
Մի քանի օր է ինչ որոշ լրատվամիջոցներ նոյեմբերի 24-ին Նոր Արեշ 44 փողոցի տներից մեկի առաջին հարկում գտնվող ավտոտնակում կայանված 2 «Lexus» մակնիշի ավտոմեքենաների այրելու դեպքը՝ այս կամ այն կերպ շահարկում են, փորձում են ներկայացնել իբրև իմ դեմ ուղղված քայլ: Որոշներն էլ փորձում են քաղաքական շահարկումներ անել։
Որոշել էի այս թեմային առհասարակ չանդրադառնալ այն ստերին, որոնք վերջին շրջանում իմ անձի հետ կապված տարածում են, բայց, հասկացա, որ մեր հասարակությունը պետք է իմանա իրականությունը։
Նշված երկու մեքենաները պատկանում են իմ վարորդի բարեկամին, ով երկար տարիներ բնակվելով ԱՄՆ-ում վերջին մեկ ու կես տարուց ավելի է ինչ մեքենաներ է ուղարկում Հայաստան, այստեղ վաճառք իրականացնելու համար և այն գրանցվում է իմ վարորդի անունով։
Ինչ վերաբերվում է նշված դեպքին, ապա ուզում եմ տեղեկացնել, որ թե իմ վարորդը, և թե վերջինիս մայրը այս դեպքով ցուցմունք են տվել և ինչպես արդեն հայտնել է ոստիկանությունը, նշված գործով կա ձերբակալված անձ։
Միաժամանակ հայտնում եմ, որ իմ, իմ ընտանիքին պատկանող գույքը, տրանսպորտային միջոցը և այլ միջոցները նշված են իմ հայտարարագրում. բաց և թափանցիկ: Թե նախկինում և թե հիմա՝ ես չունեմ որևէ գույք, որոնք այլ մարդու անունով է գրանցված և առհասարակ դեմ եմ նման գործելաոճին, որը չի բխում մեր որդեգրած արժեքներին:
Պատասխանատու հայտնում եմ, որ այդ մեքենաներն ու դեպքն իմ և իմ ընտանիքի անդամների հետ որևէ կապ չունեն»:
Արփինե ՍԻՄՈՆՅԱՆ
