Հակակոռուպցիոն դատարանում դատավոր Վահե Դոլմազյանի նախագահությամբ այսօր շարունակվեց նախկին դատավոր Արուսյակ Ալեքսանյանի, նրա օգնական Թամարա Պետրոսյանի եւ փաստաբան Էրիկ Ալեքսանյանի գործով դատական նիստը:
Նախորդ դատական նիստում Արուսյակ Ալեքսանյանի պաշտպաններից Հովսեփ Սարգսյանը ներկայացրել էր միջնորդություն՝ քրեական վարույթով ձեռք բերված ապացույցներն անթույլատրելի ճանաչելու մասին այն հիմնավորմամբ, որ այդ ապացույցները ձեռք են բերվել սույն պարագայում քրեադատավարական ոչ պատշաճ սուբյեկտի կողմից այնքանով, որքանով քրեական վարույթով նախաքննությունը ի սկզբանե պետք է իրականացվեր Հակակոռուպցիոն կոմիտեում: Այդ համոզման է Արուսյակ Ալեքսանյանի ամբողջ պաշտպանական թիմը: Նրանց պնդմամբ, դրանից հետո միայն եթե գլխավոր դատախազը իր ստորադաս դատախազը հանդիսացող հսկող դատախազի միջոցով տեղեկություն ստանար, որ Հակակոռուպցիոն կոմիտեն Արուսյակ Ալեքսանյանի վերաբերյալ քրեական վարույթը քննում է ոչ համակողմանի կամ ոչ օբյեկտիվ, ապա միայն այդ պարագայում գլխավոր դատախազը քրեադատավարական իր կոնկրետ լիազորությունն օգտագործելով իրավասու էր որպես վերջին միջոց Հակակոռուպցիոն կոմիտեից քրեական վարույթի նախաքննությունը հանձնարարել ԱԱԾ քննչական դեպարտամենտին:
Արուսյակ Ալեքսանյանի պաշտպան Անդրանիկ Մանուկյանը դատական նիստից հետո Aravot.am-ին ասաց. «Որեւէ հիմնավորում այն մասին, որ ԱԱԾ քննչական դեպարտամենտը պետք է ի սկզբանե իրականացներ նախաքննություն քանի որ Հակակոռուպցիոն կոմիտեն անաչառ չէր կարող լինել, ոչ այլ ինչ է, եթե ոչ Հակակոռուպցիոն կոմիտեին գլխավոր դատախազի կողմից հայտարարված անվստահություն: Այսինքն, կոնկրետ քրեական վարույթով անվստահություն պետական կառույցին, ինչը ոչ միայն տրամաբանական չէ, այլեւ ընդունելի չէ:
Կարդացեք նաև
Այսօրվա դատական նիստում այդ միջնորդության քննությունը շարունակվեց: Դատարանը Հովսեփ Սարգսյանի միջնորդությունը չբավարարեց, պաշտպանական կողմից տարբերվող կարծիք հայտնեց կոնկրետ գլխավոր դատախազի կայացրած որոշման վերաբերյալ: Բայց մենք մտադիր ենք մեր դիրքորոշումը զարգացնել ավելի բարձր ատյաններում՝ վերաքննիչում, այնուհետեւ՝ վճռաբեկում, ինչու չէ, նաեւ Սահմանադրական դատարանում: Մյուս դատական նիստերին կներկայացվեն այլ միջնորդություններ»:
Հաջորդ դատական նիստը տեղի կունենա դեկտեմբերի 3-ին, ժամը 16:00-ին:
Աշոտ ՀԱԿՈԲՅԱՆ
