Գյումրիում դեկտեմբերի 8-ին, 9-ին և 10-ին կայանալու են նախնական ընտրություններ։
Այս մասին քիչ առաջ տեսանյութով հայտարարեց վարչապետ Նիկոլ Փաշինյանը՝ մանրամասնելով, թե ինչպես են ընտրելու Գյումրու քաղաքապետի ժամանակավոր պաշտոնակատար, որն ամենայն հավանականությամբ կդառնա թեկնածու։
«Սիրելի քաղաքացիներ, բոլորն ասում են, որ Գյումրիում հաստատված կառավարման ճգնաժամը հնարավոր չի լինելու հաղթահարելու առանց վարչապետի միջամտության։
Եվ այդ միջամտությունը կլինի հետևյալը՝ առաջիկայում ընդունվելիք օրենսդրական փոփոխությունների արդյունքում ես պետք է Գյումրիում քաղաքապետի ժամանակավոր պաշտոնակատար նշանակեմ։
Կարդացեք նաև
Եվ քննարկելով «Քաղաքացիական պայմանագիր» կուսակցության վարչության հետ՝ եկել ենք այն եզրակացության, որ այդտեղ միանձնյա վարչական որոշմամբ չէ, որ պետք է նշանակում իրականացնեմ, և այդ նպատակով առաջիկայում Գյումրիում տեղի կունենան նախնական քվեարկություններ կամ նախնական ընտրություն։
Որն է դրա իմաստը, մենք կխնդրենք «Քաղաքացիական պայմանագիր» կուսակցության անդամներին, «Քաղաքացիական պայմանագիր» կուսակցության համակիրներին, «Քաղաքացիական պայմանագիր» կուսակցության համախոհների շրջանակից որպեսզի առաջադրվեն կամ ինքնառաջադրվեն թեկնածուներ։
Այդ թեկնածուներին քաղաքական որոշակի չափանիշներով կգրանցնեք, ոմանց գրանցումը հնարավոր է մերժենք, այստեղ զուտ քաղաքական հայեցողության չափանիշ է գործելու, որից հետո մենք Գյումրիի բնակիչների շրջանում, իհարկե, ոչ բոլորի, որոշակի սկզբունքով՝ ինչ-որ առումով նաև պատահականության սկզբունքով կիրականացնենք քվեարկություն և քվեարկության արդյունքներով հաղթած թեկնածուին կնշանակեմ Գյումրիի քաղաքապետի պաշտոնակատար, որը մեծ հավանականությամբ կլինի նաև մեր թեկնածուն Գյումրիի ՏԻմ առաջիկա ընտրություններում։
Նախնական ընտրությունները տեղի կունենա դեկտեմբերի 8-ին, 9-ին և 10-ին։ Այսօր ես ցանկացա այս ամսաթիվն ու այս որոշման մասին հրապարակել, հետագա մանրամասների համար կտեղեկացնենք լրացուցիչ»,-ասաց Նիկոլ Փաշինյանը։
Նունե ԱՐԵՎՇԱՏՅԱՆ
