Հետազոտությունները ցույց են տալիս, որ կանայք հաճախ սահմանափակ հասանելիություն ունեն հանքարդյունաբերությունից ստացվող տնտեսական օգուտներին՝ տղամարդկանց կողմից վերահսկվող ռեսուրսներով, ինչը մեծացնում է կանանց տնտեսական կախվածությունը եւ բացառում նրանց որոշումների կայացման գործընթացներից, ինչպես տնային, այնպես էլ համայնքային մակարդակներում: Բացի այդ, հանքարդյունաբերության առողջական ազդեցությունը ծանր է, որտեղ կանայք և երեխաները հատկապես խոցելի են թունավոր նյութերի ազդեցության առումով, ինչպիսիք են սնդիկը եւ կապարը: «Հաջողակ կին» երիտասարդական ՀԿ-ն եւս այդ թեմայով հետազոտություն է իրականացրել։
«Հետազոտությունն իրականացնելու համար ընտրել ենք 4 բնակավայր՝ Ախթալա, Շնող, Թեղուտ եւ Մեծ Այրում։ Համարում ենք, որ այդտեղ հիմնականում ավելի խոցելի են կանայք եւ հանքարդյունաբերական ազդեցությունը հենց իրենք են կրում։ Կանանց ֆիզիկական, ֆիզիոլոգիական առանձնահատկությունները եւ կյանքի որոշակի փուլում վերարտադրողականության կարեւոր ֆունկցիա կատարելը նրանց առավել խոցելի է դարձնում»,- Մեդիա կենտրոնում կայացած «Հանքարդյունաբերության ազդեցությունը կանանց կյանքի որակի վրա» թեմայով քննարկման ժամանակ` հետազոտությունը ներկայացնելիս, նշեց «Հաջողակ կին» երիտասարդական ՀԿ նախագահ Հռիփսիմե Քոչարյանը։
Նա նշեց, որ հարցազրույցներ են իրականացվել 2 տարիքային խմբի կանանց հետ, 8 խմբերում մասնակցել են 18-35 տարեկան եւ 36 եւ ավելի բարձր տարիք ունեցող կանայք։ Հռիփսիմե Քոչարյանը հավելեց, որ մինչեւ 35 տարեկանների պարագայում հանքարդյունաբերության հետեւանքները ամենատագնապալի ձեւով նրանց վերարտադրողականության վրա են անդրադառնում, մասնավորապես հաճախ նկատվում են հղիության ընդհատման, մեռելածնության եւ ոչ առողջ հղիության դեպքեր։ Նրա խոսքով, այդ բնակավայրերի կանանց մոտ առաջանում են այլ հիվանդություններ եւս՝ շնչառական, սրտանոթային համակարգի խնդիրներ, ընդհուպ մինչեւ քաղցկեղ։
Կարդացեք նաև
Իրավապաշտպան Օլեգ Դուլգարյանն էլ հավելեց, որ ներկայացվածը ոչ թե գիտական հետազոտություն է, այլ ներկայացնում է տվյալ բնակավայրերի կանանց ընկալումները խնդրի վերաբերյալ, այդ կանայք ունեն մտահոգություններ, եւ մի շարք խնդիրներ կապում են հանքարդյունաբերության հետեւանքների, թափոնների վատ կառավարման հետ։
Մանրամասն տեսանյութում՝
Գոհար ՀԱԿՈԲՅԱՆ
Լուսանկարները՝ Մեդիա կենտրոնի
