«Ես իրեն զգուշացրել էի, որ գլխին սարքելու են։ Կտխրե՞մ, թե՞ չէ․․․ ավել չեմ տխրի, քան եթե, օրինակ, իմանամ, որ Վիետնամում այս տարի բրնձի բերքը վատ է եղել։ Հեչ վեջս չի, ոչ իր ճակատագիրը, ոչ դաշնակցությունից փախած՝ այսօր Շիրակի մարզպետ աշխատողի ճակատագիրը, ոչ Ազատամուտի նախկին դաշնակցական համայնքապետի ճակատագիրը, որը ՀՅԴ-ից փախավ եւ բավականին լավ պաշտոն է ստացել։ Հովիկ Աղազարյանի դեպքը մի քիչ ուրիշ է, ինքը չի հեռացել, մենք ենք հեռացրել, բայց բոլոր կրոնափոխ, դավանափոխների վերջը դա է լինելու»,- խորհրդարանում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանը՝ պատասխանելով լրագրողի դիտարկմանն ու հարցին՝ ըստ լուրերի, ՔՊ խմբակցության անդամ, նախկին դաշնակցական Հովիկ Աղազարյանն այսօր մանդատը վայր է դնելու՝ շատ կտխրե՞ք։
Ինչ վերաբերվում է Նիկոլ Փաշինյանի վերջին հարցազրույցին, Արթուր Խաչատրյանի բնութագրումը հետեւյալն է․ «Ինքը պատրաստվում է ընտրությունների՝ հերթական կամ արտահերթ, փորձում է այդպիսի պոպուլիստական հարցերով էժան հեղինակություն ձեռք բերել»։
Իսկ ծառայողական մեքենաների ցուցադրական կրճատման մասին էլ ընդդիմադիր պատգամավորն ասաց, որ դա երկրի առաջին դեմքի լուծելիք հարց չէ, բայց Նիկոլ Փաշինյանը հասկացել է, որ «պադավատների» հարցը հանրային մեծ ռեզոնանս ունեցող խնդիր է, փորձում է ցույց տալ, որ մեղավոր են իր բոլոր ենթակաները, որոնք իրեն ճիշտ չեն զեկուցել․ «Դե, հիմա․․․ կառավարության ղեկավարի հոգսը չէ՝ իմանալ, թե քանի «պադավատ» կա»։
Նելլի ԳՐԻԳՈՐՅԱՆ
