«ՓՄՁ համագործակցության ասոցիացիան» բաց նամակ է տարածել, որում մասնավորապես ասված է.
«Հարգելի պարոն Փաշինյան,
Մենք՝ ներքոստորագրյալ կառույցների ներկայացուցիչներս, սույնով դիմում ենք Ձեզ պահանջով` գալ կառուցողական երկխոսության դաշտ, բարձրաստիճան քաղաքական որոշում կայացնողների մասնակցությամբ, սկսել աշխատանքային խորը քննարկումներ հարկային օրենսդրության վերջին փոփոխությունների նախագծի շուրջ, ոլորտային շահերը ներկայացնող միությունների, ասոցիացիաների և միավորումների հետ։
Ինչպես գիտեք սույն թվականի նոյեմբերի 19-ին ՀՀ ԱԺ տնտեսական հարցերի մշտական հանձնաժողովի կազմակերպած խորհրդարանական լսումներին քննարկվեց «Հայաստանի Հանրապետության հարկային օրենսգրքում լրացումներ և փոփոխություններ կատարելու մասին» օրենքների նախագծերի փաթեթը, որը վերաբերում է մասնագիտական ծառայությունների ոլորտը շրջանառության հարկի ռեժիմից ընդհանուր հարկման համակարգ տեղափոխելու նախաձեռնությանը: Այս և սրան նախորդող, արդեն ընդունված, հարկային օրենսդրության փոփոխությունները ուղղորդվում են այնպիսի հիմնավորումներով, որտեղ ներկայացվում են միայն բյուջեի հնարավոր եկամուտների ավելացման հնարավորությունները, առանց խորը ուսումնասիրությունների և կառավարության սահմանված կարգով ոչ պարզ և ոչ էլ բարդ ընթացակարգով կարգավորման ազդեցության գնահատականների (ԿԱԳ)։ Սա այն դեպքում, երբ հիշյալ փոփոխությունների շահառուները տասնյակ հազարից ավել տնտեսվարողներ են։
Լսումների ավարտին ՀՀ օրենսդիր և գործադիր մարմինների ներկայացուցիչները, հաշվի առնելով ներկայացված նախագծի շուրջ բարձրացված հարցերը, մտահոգությունները և հնարավոր խնդիրների լրացուցիչ քննարկման անհրաժեշտությունը, խոստացան ՀՀ ԱԺ տնտեսական հարցերի մշտական հանձնաժողովում, ՀՀ ֆինանսների նախարարությունում, ինչպես նաև ոլորտային շահերը ներկայացնող միությունների, ասոցիացիաների և միավորումների նախընտրելի վայրում և ձևաչափով կազմակերպել առանձին աշխատանքային քննարկումներ:
Քանի որ մեկ բաց նամակով հնարավոր չէ մանրակրկիտ և ոլորտներով ներկայացնելու բոլոր հակափաստարկները վերոհիշյալ նախագծի վատ հետևանքների մասին և ելնելով հարցի կարևորությունից,
Տեղեկացնում ենք, որ այդ նպատակով սույն թվականի նոյեմբերի 29-ին կազմակերպում ենք աշխատանքային քննարկում կառուցողական և փորձագիտական ձևաչափով՝ միայն մասնագիտական փաստարկների հիման վրա քննարկելու բոլոր խնդրահարույց հարցերը և գտնելու ՀՀ և ՓՄՁ լավագույն շահերն արտահայտող համաձայնեցված լուծումներ»։
Բաց նամակին միացած կազմակերպություններ՝
| ՀՀ | Կազմակերպության անվանումը | Ներկայացուցիչ |
| 1 | «ՓՄՁ համագործակցության ասոցիացիա» ՀԿ | Հակոբ Ավագյան |
| 2 | Հայաստանի գործատուների հանրապետական միություն | Վահագն Համբարձումյան |
| 3 | «Իրավաբանների հայկական ասոցիացիա» ՀԿ | Կարեն Զադոյան |
| 4 | Հայաստանի Առևտրաարդյունաբերական պալատ | Անդրանիկ Ալեքսանյան |
| 5 | «Հայաստանի աուդիտորների և փորձագետ հաշվապահների պալատ» ՀԿ | Վահան Գրիգորյան |
| 6 | «Հայաստանի հաշվապահների ասոցիացիա» ՀԿ | Հերմինե Թովմասյան |
| 7 | «Աուդիտորների պալատ» ՀԿ | Նաիրի Սարգսյան |
| 8 | «Հայաստանի ֆինանսիստների ասոցիացիա» ՀԿ | Սողոմոն Միրզոյան |
| 9 | Կառավարման խորհրդատվության Հայաստանի ինստիտուտ | Սիլվա Մեսրոպյան |
| 10 | «Փորձագիտական խորհուրդ» գնահատողների ինքնակարգավորվող համահայկական միություն | Վահրամ Սաֆարյան |
| 11 | «Հայաստանի ռիելթորների ասոցիացիա» ՀԿ | Դավիթ Ամիրյան |
| 12 | «Կլուբ կապիտալ» գործարար միջավայրի զարգացման ՀԿ | Գրիգոր Առաքելյան |
| 13 | «Մադամ» գործարար կանանց ակումբ ՀԿ | Տաթև Բեյբության |
| 14 | «Հայաստանի հանրապետության ֆրանչայզինգի ասոցիացիա» ՀԿ | Արթուր Վարդանյան |
| 15 | «Իրազեկ հարկատու» ՀԿ | Արթուր Մալխասյան |
