Ռուսաստանը կարծում է, որ ռուս-հայկական դաշնակցային փոխգործակցությանը, այդ թվում՝ ՀԱՊԿ շրջանակներում, համադրելի իրական այլընտրանքներ չկան. ասել է Հայաստանում ՌԴ դեսպան Սերգեյ Կոպիրկինը՝ «Իզվեստիա»-ին տված հարցազրույցում: Այսպես է նա պատասխանել հարցին, թե ՀԱՊԿ-ում իր աշխատանքները սառեցրած Հայաստանը նոյեմբերի 28-ին կմասնակցի՞ Աստանայում կայանալիք նիստին և արդյոք Ռուսաստանը հավատարի՞մ է Հայաստանի անվտանգությունն ապահովելու իր պարտավորություններին` ինչպես երկկողմ ձևաչափով, այնպես էլ ՀԱՊԿ-ի միջոցով։
Կոպիրկինը վստահեցրել է՝ Ռուսաստանը հավատարիմ է Հայաստանի անվտանգությունն ապահովելու իր պարտավորություններին`ինչպես երկկողմ ձևաչափով, այնպես էլ ՀԱՊԿ-ի միջոցով։
«Մենք նաև ակնկալում ենք մեր հայ գործընկերների ակտիվ ներգրավվածությունը Եվրասիական մայրցամաքում հավասար անվտանգության համակարգի մշակման ջանքերին։ Այս գաղափարն առաջ է քաշել Ռուսաստանի նախագահ Վլադիմիր Պուտինը հունիսի 14-ին կայացած հանդիպման ժամանակ։ Հարցը բարձրացվել է նաև վերջերս Կազանում՝ BRICS գագաթնաժողովին», – ասել է դեսպանը։
Անդրադառնալով Հայաստանի և Ադրբեջանի միջև խաղաղության պայմանագրի ստորագրմանը՝ Կոպիրկինն ասել է, որ Մոսկվան շահագրգռված է հնարավորինս շուտ տեսնելու երկու երկրների միջև տևական խաղաղություն։
Կարդացեք նաև
«Միևնույն ժամանակ, կարևոր է, որ տարածաշրջանի համար ճակատագրական այս փաստաթուղթը հիմնված լինի բոլոր փոխադարձ մտահոգությունների արդարացի լուծման վրա՝ առանց կողմերից որևէ մեկի համար «դառը հետևանքների», – ասել է դեսպանը:
Հարցին, թե Ռուսաստանը դեռ պատրա՞ստ է օգնել կողմերին խաղաղության պայմանագրի կնքման հարցում, դեսպանը պատասխանել է․ – «Մենք հստակ տեսնում ենք, որ Երևանի և Բաքվի միջև փոխընդունելի փոխզիջումների հասնելը բարդ և ժամանակատար գործընթաց է, սակայն Ռուսաստանը պատրաստ է հայ և ադրբեջանցի գործընկերներին աջակցություն ցուցաբերել երկկողմ հարաբերությունների կարգավորման հարցում՝ հիմնված Ռուսաստանի, Հայաստանի և Ադրբեջանի ղեկավարների միջև 2020-2022 թվականների եռակողմ համաձայնագրերի վրա։ Նման օգնության ձևերն ու ծավալները պետք է բանակցող կողմերն ընտրեն։ Այս առումով մենք ուրախ ենք, որ հոկտեմբերի 24-ին Կազանում՝ BRICS-ի գագաթնաժողովում, Հայաստանի և Ադրբեջանի միջև ամենաբարձր մակարդակով արդյունավետ շփումներ տեղի ունեցան, ինչը հնարավորություն տվեց օգտակար ազդակ հաղորդել հարաբերությունների կարգավորման երկխոսությանը»։
Ռուսաստանը Հայաստանի հետ ռեկորդային՝ 14-16 մլրդ դոլարի ապրանքաշրջանառություն է ակնկալում. նաեւ ասել է ՌԴ դեսպան Կոպիրկինը:
Եթե խոսենք կոնկրետ թվերի մասին, ապա արդեն 2024 թվականի առաջին կիսամյակում երկրների առևտուրը գերազանցել Է 8,3 մլրդ դոլարը՝ ծածկելով ամբողջ 2023 թվականի ցուցանիշները՝ 7,4 մլրդ դոլար։
Նրա խոսքով, երկրներն աշխատում են համատեղ նախագծերի մեկնարկի վրա, որոնք կօգնեն Հայաստանի արդյունաբերության զարգացմանը, կստեղծեն աշխատատեղեր և կավելացնեն բյուջեի մուտքերը:
Ըստ «Ազատության» եւ «Սպուտնիկ Արմենիայի» հրապարակումների
