Քիչ առաջ Aravot.am-ի խմբագրություն էր ահազանգել Շիրակի մարզի Աշոցք խոշորացված համայնքի բնակիչ 39-ամյա Արմեն Հարությունյանը՝ դժգոհելով, որ թեև Շիրակի մարզի սպանդանոցներից որևէ մեկը չի գործում, բայց իրեն փորձում են վարչական տուգանքի ենթարկել՝ ոչ սպանդանոցային միս իրացնելու համար։
«Ես իմ երկու կովին և երինջին հարկադիր մորթի եմ ենթարկել, բանկում վարկ ունեմ, ստիպված անասուններիս միսն եմ վաճառում, որ տոկոս փակեմ։ Երեկ երեկոյան հենց Գյումրի մտա, ինձ կանգնեցրեցին ոստիկաններն ու ասացին, որ պիտի վարչական տուգանքի ենթարկեն։
Այս պահին Գյումրու ոստիկանության Կումայրի բաժնի հատուկ պահպանվող տարածքում եմ, Երևանից ՍԱՏՄ-ի մեքենան պիտի գա, որ տանեն, անասունների միսը այրեն։
Ինձ փաստացի 1 միլիոն դրամի վնաս են հասցնում, հարցնում եմ՝ եթե չկա սպանդանոց մարզում, ինչ ձևի սպանդանոցային մորթի ենթարկեմ, ՍԱՏՄ-ի տեսուչը պատասխանում է՝ ինձ նման հարցեր չտաք, էդ հարցերը գնացեք մարզպետարանում տվեք։
Կարդացեք նաև
Նաև հուշում են, որ պիտի հասած լինեի Արագածոտնի մարզ, այնտեղ սպանդանոցային մորթի ենթարկեի անասուններիս։
Ես բողոքարկելու եմ, բացարձակ դեմ չեմ սպանդանոցային մորթին, բայց նախ թող սպանդանոցով ապահովեն, հետո նոր փորձեն պահանջել, լավ օրից չեմ անասուններիս մորթել», – բողոքում էր բնակիչը։
Հիշեցնենք, որ Շիրակի մարզից ընտրված Ազգային ժողովի «Հայաստան» խմբակցության պատգամավոր, ՀՅԴ-ական Մհեր Մելքոնյանը դեռ ամռանը էր այցելել Շիրակի մարզի սպանդանոցներ ու լուսանկարներով ցույց տվել, որ թե՛ Աշոցքում, թե՛ Անիի տարծաշրջանի Հայկաձոր գյուղում և թե՛ Ձորակապ գյուղի մոտ գտնվող սպանդանոցները միայն փաստաթղթերով գոյություն ունեն, իրականում չեն գործում․ շենքերի դռները կողպած են, բակերը՝ խոտածածկ եղած։ ՝ փաստաթղթով լինելը, բայց իրականում չգործելը։
Շիրակի մարզի տարբեր գյուղեր այցելած պատգամավորին բնակիչները բողոքել են, որ իրենք չեն ուզում օրենք խախտել, պատրաստ են սպանդանոցային մորթին ենթարկել կենդանուն, սակայն հնար չկա․ պայման չեն ստեղծում, սպանդանոցները գործի չեն դնում՝ գյուղացիների կյանքը բարդացնելով, խնդիրներով ստեղծելով ու ամենայն հավանականությամբ իրենց հատուկ տուգանքի ենթարկելու նպատակով։
Թեմայի շուրջ պատրաստ ենք լսել ՍԱՏՄ պարզաբանումը։
Նունե ԱՐԵՎՇԱՏՅԱՆ
