«Սրբազան պայքար» շարժման առաջնորդ Բագրատ սրբազանն այսօր ուղիղ եթերով անդրադարձել է ներքաղաքական վերջին իրադարձություններին, բարձրաստիճան պաշտոնյաների պաշտոնանկություններին:
«Ի՞նչ տեղի ունեցավ, տեղի ունեցավ բոլորիդ աչքի առջեւ, որ չարիքը WhatsApp- ի հավելվածով զումեր ուղարկեց նախարարների, պատգամավորների, նույնիսկ բարձրագույն դատարանի խորհրդի դատավորին ու պարզապես հրաժարեցնել տվեց: Հետո որոշեց, որ դա ոչ թե հրաժարականի պահանջ էր, այլ՝ խնդրանք: Զավեշտի գագաթնակետն է ուղղակի, թե ինչպես է գործում պետական ապարատը կամ ինչպես է այդ մարդը ցավի իշխանի տեսքով վարվում ձեզ հետ»,- ասաց Բագրատ սրբազանը:
Նա հիշեցրեց, որ ավելի վաղ էլ էր զգուշացրել պաշտոն զբաղեցնող անձանց, որ նրանք ամենավերջին ձեւով օգտագործվելու են, անընդհատ ծաղրվելու են ու դեն շպրտվեն ամենակեղտոտ ձեւով:
«Այս մարդը ձեզ օգտագործել է բոլոր հնարավոր տարբերակներով, դարձրել իր համար վահան, պաշտպանության օղակ: Ձեր միջոցով կարողացել է ինքն իրեն ոչ թե վերագրել մեղսագրումներ, այլ այդ ամենը վերագրել է ձեզ. հայրենիքի, մեր պետության սահմանների անվտանգության խախտում, բանակի քայքայում, հազարավոր զոհեր, Արցախի կորուստ, ռազմաքաղաքական մեր ղեկավարության պատանդառություն, գերիներ, ներքին կյանքի ատելություն, թշնամություն: Տեղեկատվական դաշտի ահաբեկչությունը, մարդկանց թիրախավորելը… ամեն բան: Զգուշացրել ենք խորհրդարանի ամբիոնից էլ ձեզ՝ ՔՊ խմբակցության անդամներ, որ յուրաքանչյուրիդ այս մարդը մեղսակից է դարձնում իր գործած բոլոր հանցանքներին: Եվս մեկ անգամ դիմում եմ ձեզ, որ դուք ձեզ հաշիվ տաք, քննեք ձեր սրտերը՝ ինչ եք անում, ում եք ծառայում:
Կարդացեք նաև
Մեկ մարդու քմահաճույքով ուղղակի հեռացումներ: Հեռացումները պետք է լինեն վատ աշխատանքի համար, բոլորի հրաժարման դիմումները խոսում են արձանագրումների, ձեռքբերումների մասին: Խոսում են, թե ինչպիսի ահռելի աշխատանք են կատարել: Եթե այդքան ահռելի աշխատանք են կատարել, ինչու են հեռացվում: Սա նշանակում է ոչ հաշվետվություն, ոչ թափանցիկություն, ոչ պատասխանատվություն, սա նշանակում է ամբողջ պետական համակարգի քայքայում, մի մարդու քմահաճույք»,- ասաց Բագրատ սրբազանը:
Արփինե ՍԻՄՈՆՅԱՆ
