«Ամերիկայի ձայն». Ամերիկյան կարգավորող մարմինները ձգտում են դատարանի միջոցով պարտավորեցնել Google-ին մասնատել իր բիզնեսը, որպեսզի տեխնոլոգիական հսկան չկարողանա ճնշել մրցակցությունն իր որոնողական համակարգի միջոցով։
Առաջարկը 23 էջանոց փաստաթղթում է, որը ԱՄՆ Արդարադատության նախարարությունը դատարան է ներկայացրել չորեքշաբթի։
Գերատեսչությունը պահանջում է վաճառել Chrome զննարկիչը և հաստատել սահմանափակումներ, որպեսզի Android օպերացիոն համակարգով գործող սմարթֆոնների համար այլևս առավելություն չտրվի Google որոնողական համակարգին։
Ըստ դիտորդների՝ ԱՄՆ կառավարության կողմից ներկայացված նման առաջարկությունները ցույց են տալիս, թե որքան խիստ է մոտենում նախագահ Ջո Բայդենի վարչակազմը շրջանային դատավոր Ամիտա Մեհտայի որոշմանը, ըստ որի այս օգոստոսին Google ճանաչվեց մոնոպոլիստ։ Սակայն, մյուս կողմից, չի բացառվում, որ այս հարցում Դոնալդ Թրամփի գալիք վարչակազմը կարող է որդեգրել ավելի մեղմ դիրքորոշում։
Կարդացեք նաև
Google-ի դեմ պատժամիջոցների հարցով դատական լսումները նախատեսված են Վաշինգտոնում հաջորդ տարվա ապրիլին, իսկ վերջնական որոշումը դատավոր Մեհտան ծրագրում է կայացնել 2025 թվականի սեպտեմբերի սկզբին։
Եթե դատարանը ընդառաջ գնա ԱՄՆ Արդարադատության նախարարության պահանջներին, Google-ը, ըստ ամենայնի, կբողոքարկի որոշումը, որի քննությունը, իր հերթին, կարող է տևել մոտ չորս տարի։
Բացի Chrome-ի վաճառքից և Android-ին վերաբերող սահմանափակումներից, Արդարադատության նախարարությունը պահանջում է արգելել Google-ին կնքել բազմամիլիարդանոց համաձայնագրեր, որոնք ապահովում են նրա որոնողական համակարգի տեղադրումը սմարթֆոններում՝ որպես կանխադրված (by default) համակարգ։
Կարգավորող մարմինները նաև առաջարկում են պարտավորեցնել ընկերությանը մրցակիցների հետ կիսվել օգտատերերի կողմից իրականացվող հարցումների վերաբերյալ տվյալները, որպեսզի այլ ընկերությունները ստանան ավելի մեծ հնարավորություններ՝ Google-ի գերիշխող դիրքի պայմաններում մրցելու համար։
«Google-ի վարքագիծը հանգեցրել է անհավասար պայմանների բիզնեսի համար, իսկ նրա որակի հիմքում ապօրինաբար ձեռք բերված առավելությունների արդյունք է։ Կիրառվող միջոցառումները պետք է վերացնեն այս անհավասարակշռությունը և զրկեն Google-ին այդ առավելություններից»,- նշված է ԱՄՆ Արդարադատության նախարարության առաջարկներում։
ԱՄՆ նորընտիր նախագահ Դոնալդ Թրամփն ավելի վաղ մտահոգություն էր հայտնել, թե ընկերության բիզնեսների մասնատումը կարող է հանգեցնել Google-ի կործանմանը, սակայն չէր հստակեցրել, թե որ պատժամիջոցներն է համարում ընդունելի։
«Պարտադիր չէ մասնատել կազմակերպությունը, որպեսզի այն ավելի արդար դառնա»,- այս հոկտեմբերին հայտարարել էր Թրամփը։
ԱՄՆ Ներկայացուցիչների տան նախկին անդամ, հանրապետական Մեթ Գեթցը, ում Թրամփը նախատեսում է առաջադրել ԱՄՆ գլխավոր դատախազի պաշտոնում, նախկինում կողմ էր խոշոր տեխնոլոգիական կորպորացիաների բաժանմանը, թեև Սենատում նրա թեկնածության հաստատումը կարող է բախվել լուրջ խոչընդոտների։
