Նոյեմբերի 20-ին մեր ժամանակների վիրտուոզ ջութակահարներից մեկը՝ Լեյա Զուն, ելույթ ունեցավ Խաչատրյանի անվան 12-րդ միջազգային փառատոնի բացման համերգին, որը նաեւ ուղիղ հեռարձակվում էր: Ունկնդիրը վայելելեց Արամ Խաչատրյանի հանրահայտ Ջութակի կոնցերտը` 18-ամյա Լեյա Զուի կատարմամբ։ Ջութակահարը Կոմիտասի «Կռունկն» էլ կատարեց, թեեւ այն ծրագրում չկար: Կատարեց անչափ զգացմունքային եւ իրեն բնորոշ վարպետությամբ:
Համերգին հնչեց նաեւ Արամ Խաչատրյանի 2-րդ՝ «Զանգով սիմֆոնիան», որի ավարտից հետո դահլիճն ուղղակի դղրդում էր հոտնկայս ծափահարություններից։ Նվագախումբը ղեկավարում էր Հայաստանի պետական սիմֆոնիկ նվագախմբի գեղարվեստական ղեկավար եւ գլխավոր դիրիժոր, ՅՈՒՆԻՍԵՖ-ի բարի կամքի դեսպան Սերգեյ Սմբատյանը: Համերգն իսկական խաչատրյանական երաժշտական հրավառություն էր:
Համերգը նվիրված էր ՄԱԿ-ի «Երեխայի իրավունքների մասին» կոնվենցիայի 35-ամյակին: Սրանով էր պայմանավորված, որ համերգը բացվեց Ջոն Լենոնի հայտնի Imagine երգի ՅՈՒՆԻՍԵՖ-յան տարբերակով, որի նպատակն էր բոլորին կոչ անել միանալու երեխաների իրավունքներին ուղղված քայլերին: Համերգին ներկա էր Հայաստանում ՄԱԿ-ի մանկական հիմնադրամի (ՅՈՒՆԻՍԵՖ)-ի ներկայացուցիչ Քրիստինե Վայգանդը, որը կարեւորեց «Երեխայի իրավունքների մասին» կոնվենցիան եւ նշեց, որ Օպերայի շենքի կապույտ լուսագունավորումը օրվա խորհրդի մասին է վկայում:
Դառնալով բացառիկ ջութակահար Լեա Զուին՝ նշենք, որ նա 4 տարեկանում հանդես է եկել դեբյուտային համերգով, իսկ 8 տարեկանում արդեն կատարում էր Մենդելսոնի ջութակի կոնցերտը: Ներկայումս էլ ելույթ է ունենում Եվրոպայի խոշորագույն համերգասրահներում, հանդես գալիս հեղինակավոր փառատոներին:
Կարդացեք նաև
Հավելենք, որ Խաչատրյանի անվան միջազգային փառատոնը կազմակերպում է «Արամ Խաչատրյան» մշակութային հիմնադրամը՝ ՀՀ ԿԳՄՍ նախարարության, Երևանի քաղաքապետարանի եւ Խախամյան հերիթիջի աջակցությամբ։ Այն մշտապես հյուրընկալում է համաշխարհային ճանաչում վայելող երաժիշտների:
Փառատոնը կտեւի մինչեւ դեկտեմբերի 16-ը, եւ 6 համերգի ընթացքում երաժշտասերները հնարավորություն կունենան վայելելու Խաչատրյանի, Շոստակովիչի, Չայկովսկու, Ռիմսկի-Կորսակովի, Դվորժակի, Բարբերի, Սըր Կառլ Ջենքինսի, Բրամսի, Բերգի, Լիստի և Շոպենի հայտնի ստեղծագործությունները:
Բացի Լեա Զուից, Սիմֆոնիկ կվագախմբի հետ հանդես կգան ջութակահար Կլարա-Ջումի Կանգը եւ թավջութակահար Սոֆի Քաուերը։ Մենահամերգ կունենա իտալացի դաշնակահար Անտոնիո դի Կրիստոֆանոն։
Համերգները կղեկավարեն Հայաստանի պետական սիմֆոնիկ նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանը, դիրիժորներ Մարկո Կրիսպոն (Իտալիա) և Մարկո Պարիսոտտոն (Կանադա)։
Գոհար ՀԱԿՈԲՅԱՆ
