Անդրսահմանային ջրային ռեսուրսների կառավարման հարցում Հայաստանի և Ադրբեջանի միջև պաշտոնական համագործակցություն չկա, Սպուտնիկ Արմենիայի հարցմանն ի պատասխան հայտնել են ՀՀ ԱԳՆ-ից՝ մեկնաբանելով Բաքվում ԱՄՆ դեսպանի վերջին հայտարարությունը:
«Այս թեմայով շփումները եղել են միայն երկու երկրների հասարակական կազմակերպությունների մակարդակով», – նշել են նախարարությունում։
Հիշեցնենք՝ Բաքվում ԱՄՆ դեսպան Մարկ Լիբբին հայտարարել է՝ Հայաստանն ու Ադրբեջանը աշխատում են անդրսահմանային գետերի ջրային ռեսուրսների կառավարման համալիր սխեմայի ստեղծման ուղղությամբ:
«Ադրբեջանի և Հայաստանի հիդրոլոգների և ինժեներների խումբը ԱՄՆ-ի ակտիվ աջակցությամբ անդրսահմանային գետերի ջրային ռեսուրսների կառավարման համալիր սխեմա է մշակում»,- նշված է դիվանագիտական առաքելության X-ի միկրոբլոգում:
