«Պրոֆեսիոնալ կրթությունը կանխարգելիչ բնույթ ունի, որովհետեւ մենք տեսնում ենք, որ շատ դեպքերում խոշտանգման դեպքերը լինում են ոչ միայն ուղղակի դիտավորությամբ, այլ նաեւ կրթության պակասից։ Ուղղակի ծառայողը չգիտի՝ ինքն ինչ գործողություն պետք է անի այդ պահին, որն իրավաչափ է կամ ուժի գործադրում անի, որը համաչափության սահմաններում է, եւ հայտնվում է այնպիսի իրավիճակում, որ ինքը խոշտանգող գործողություն է իրականացնում»,- այսօր «Խոշտանգումներից, արժանապատվությունը նվաստացնող վերաբերմունքից զերծ մնալու բացարձակ իրավունքի պաշտպանության վիճակը Հայաստանում․ արդյոք հաղթահարելի է անպատժելիությունը» թեմայով քննարկման ժամանակ ասաց ՆԳՆ Ռազմավարական պլանավորման, քաղաքականության մշակման և մոնիթորինգի վարչություն պետ Արմեն Մկրտչյանը։
Նա նշեց, որ կանխարգելման ուղղությամբ գործողություններ են իրականացվում, այդ թվում՝ օրենսդրության փոփոխություններ։ «Ոստիկանության գվարդիայի մասին» նոր ընդունված օրենքով առաջին անգամ օրենքի մակարդակով նշվել են հարկադրանքի սկզբունքները։ Եվ հստակ օրենսդրական ամրագրում է եղել, թե ուժի գործադրումը որ դեպքերում պետք է լինի եւ որ դեպքերում չպետք է լինի։
«Մենք ունենք նաեւ ուժի եւ հարկադրանքի գործադրման ստանդարտները, որոնք մեր կրթահամալիրում պարտադիր դառնալու են ուսումնական նյութ»,- հավելեց Արմեն Մկրտչյանը։
Նա նշեց, որ իրենց ուսումնասիրությունները ցույց են տալիս, որ խոշտանգման դեպքերը միշտ չէ, որ ձերբակալվածներին պահելու վայրերում են լինում։ «Մենք ռիսկ տեսնում ենք անձին արգելանքի վերցնելիս, որովհետեւ այստեղ մի քանի փուլ է անցնում անձը՝ բռնվում է, տրանսպորտային միջոցով տեղափոխվում է տարածքային բաժին եւ տարածքային բաժնից նոր գնում է պահման վայր։ Եվ ձերբակալման վայրերում մենք ունենք օրենսդրություն, լուծումներ, խոսքս վերաբերում է եւ շենքային պայմաններին, եւ պահմանը, այնտեղ ընդունելու ու դուրս հանելու գործուն մեխանիզմների ներդրմանը»,- նշեց Մկրտչյանը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
