«Այս տարի ամանորյա միջոցառումների ձեւավորման աշխատանքները ձեռք են բերվել երկփուլ մրցույթի ընթացակարգով. նախատեսվել են նախաորակավորման պահանջներ՝ պոտենցիալ մասնակիցների համար: Նախաորակավորման պահանջներից մեկը հետեւյալն է եղել՝ պոտենցիալ մասնակից կազմակերպությունը պետք է այս կամ նախորդող երեք տարիների ընթացքում առնվազն 2, նվազագույնը՝ 150 մլն դրամի պայմանագիր իրականացրած լինի մշակութային միջոցառման առարկայով… Ընդհանուր առմամբ սկզբնական բյուջեն կազմում էր մոտավորապես 600 մլն դրամի կարգի»,-ասուլիսում նշեց Երեւանի քաղաքապետի տեղակալ Սուրեն Գրիգորյանը՝ ամանորյա տոնական ձեւավորման ծախսերը և միջոցառումների օրակարգը ներկայացնելիս:
Փոխքաղաքապետն ասուլիսում տեղեկացրեց, որ ծախսվելու է 549 մլն 706 հազար դրամ, որով նախատեսել էին թարմացնել գլխավոր տոնածառը, բայց գնման լոտը տեղի չի ունեցել եւ նախատեսված 50 մլն դրամը չի ծախսվել։ Նրա ներկայացմամբ՝ 2022-23 թթ ամանորյա տոնակատարությունների համար ծախսվել էր 599.9, իսկ նախորդ տարի՝ 626 մլն դրամ։
Սուրեն Գրիգորյանիի խոսքով, մրցութային հանձնաժողովը կազմված է եղել ոչ միայն գործադիրի ներկայացուցիչներից, այլեւ ավագանու անդամներից: Բացի «Մայր Հայաստան» խմբակցությունից, մյուսները առաջարկներ էին ներկայացրել: Նա հայտնեց, որ հայտեր էին ներկայացվել 5 կազմակերպություններից, որոնցից մեկը նախաորակավորման պայմաններին ի սկզբանե չի համապատասխանել, 4 ընկերությունները հրավիրվել են բանակցությունների, աշխատանքներն էլ բաժանվել են 5 լոտերի:
Վերջին շրջանում շատ քննարկվող Սուրբ Ծննդյան տոնավաճառի լոտի գնին էլ անդրադարձ կատարվեց, որը 190 մլն դրամ էր: «Փորձ է արվում հանրության շրջանում տպավորություն ստեղծվել, որ տնակները տալու ենք այդ կազմակերպությանը, ինքը տա վերավարձակալության, մի հատ էդտեղից շահույթ ստանա, մի հատ էլ 190 մլն մենք իրեն փոխանցենք: Ավագանու անդամներից մեկը փորձում է նաեւ տպավորություն ստեղծել, որ Սուրբ Ծննդյան տոնավաճառի կազմակերպումը զուտ տնակները վերցնել եւ երրորդ անձանց փոխանցել է ենթադրում: Երկու պնդումն էլ սխալ են, որովհետեւ ինչպես անցյալ տարի, այնպես էլ այս տարի պայմանագրով նախատեսված է, որ այն կազմակերպությունը, որը գումարը ստանում է երրորդ անձանցից՝ տնակներն իրենց տրամադրելու համար, այդ գումարի չափով քաղաքապետարանից փոխանցվելիք գումարից կատարվելու է նվազեցում»,-ասաց քաղաքապետի տեղակալը:
Կարդացեք նաև
«Կան ճարտարապետներ, որ ասում են՝ ինչո՞ւ եք թամանյանական սիրուն շենքերը լուսավորում, իրենք իրենցով սիրուն են, ընդունում եմ: Մի դիզայներ էլ կար, ասում էր՝ Նոր տարին ինքնին շատ անճաշակ միջոցառում է… Շատ տարբեր կարծիքներ կան, դրա համար էլ շատ կարճ ժամանակահատվածի համար վառ տոնական վիճակ ենք ստեղծում, ի վերջո մենք էլ ամեն օր վառ, տոնական շորեր չենք հագնում: Պետք է ռացիոնալ մոտենալ այս հարցին»,-ասաց նա:
Նշեց, որ միայն 60 մլն դրամ հատկացվել է Հանրապետության հրապարակի երգող շատրվանների տարածքի ձեւավորմանը, որն իրականացնում է «Ֆակտորի փրոդաքշնը»:
Մանրամասները տեսանյութում՝
Գոհար ՀԱԿՈԲՅԱՆ
