Հոկտեմբերի 28-ին վերաքննիչ քրեական դատարանի որոշումը ստանալու համար, Նարեկ Սարգսյանի պաշտպան Աննա Ծառուկյանը դիմել էր դատարան: Թե աշխատակազմից, թե գրասենյակից պատասխանել էին, որ որոշումը չկա:
Փաստաբանի մոտ առաջացել էր ողջամիտ կասկած: Նա հաջորդ օրը, ապա մինչեւ ամսի 31-ը տարբեր ժամերի բազմիցս դիմել էր` որոշման վերաբերյալ տեղեկություն ստանալու:
Ի վերջո, հոկտեմբերի 31-ին տեղեկանում է, որ մեղադրողի եւ տուժողի իրավահաջորդի ներկայացուցչի բողոքները բավարարվել են, բեկանվել է Երեւան քաղաքի քրեական դատարանի որոշումը: Նարեկ Սարգսյանին, որի նկատմամբ 20 միլիոն դրամ գրավ էր կիրառվել, եւ տնային կալանք, քրեակատարողական հիմնարկ են տեղափոխում նոյեմբերի 5-ին տնից:
Նշեմ, որ Առաջին ատյանի դատարանի դատավոր Յուզբաշյանը գրավի հիմքում դրել էր փախուստի ռիսկի բացառումը, սակայն ըստ պաշտպանի, ի սկզբանե փախուստը բացառվել է, Նարեկն իմանալով, որ իրեն են փնտրում սպանության կասկածանքով, կամավոր էր ներկայացել ոստիկանության բաժին: Բացի դա, մեկ այլ նիստից հետո, երբ խափանման միջոցի հարց էր կրկին քննարկվել, նա չորս ժամ գտնվել էր ազատության մեջ…
Կարդացեք նաև
Աննա Ծառուկյանն «Առավոտին» ասաց, որ դիմելու է ՀՀ վճռաբեկ դատարան. «Վճռաբեկը եթե չպատասխանի, թե կալանքի կամ տնային կալանքի տարբերությունը որն է, եթե գոյություն չի ունեցել փախուստի հիմք, ապա որ հիմքով է վերաքննիչը բեկանել, Վճռաբեկից պահանջելու եմ իրավաչափության հարցը: Կգնանք նաեւ Մարդու իրավունքների եվրոպական դատարան»:
Պաշտպանը նշում է, որ վերաքննիչ դատարանը թույլ է տալիս, որ մեղադրանքի կողմը մեղադրանքի ծավալից դուրս գա, ծավալ մեծացնի, եւ` բավարարում է նրա միջնորդությունը:
«Փախուստի ռիսկը արհեստական էր: Նարեկը մեկ այլ քրեական գործով տնային կալանքի ժամանակ դատարան էր ներկայացել, եւ նույնությամբ վերադարձել, եւ այդ տեղեկատվությունը ինքս եմ դատավոր Մարինե Մելքումյանին ներկայացրել»,-մեր զրույցի ժամանակ ասում է Աննա Ծառուկյանը:
Գնահատելով վերաքննիչ դատարանի հանկարծահայտ որոշումը, պաշտպանն ասում է, որ հաշվի չի առնվել Եվրոպական չափանիշները, անձի վերաբերյալ ենթադրությունները գնալով ի չիք են դառնում, հիմավորվում է, որ Նարեկը աղերս չունի նախկին կնոջ սպանության հետ, եւ այն ժամանակ, երբ Նարեկը եղել է ազատության մեջ, տուժողի հեռախոսի ալեհավաքները տալիս են որոշակի ազդանշան:
Տեղեկացանք նաեւ, որ Նարեկ Սարգսյանի հարազատները հաղորդում են ներկայացրել ԱԱԾ, գլխավոր դատախազին, դիմել են ԱՄՆ, ՌԴ, Ֆրանսիայի դեսպանատներ, վարչապետի աշխատակազմին, բոլոր հնարավոր կառույցներին: Ըստ հարազատների, դատարանների վրա որոշակի ճնշումներ կան:
Կարգապահական վարույթ հարուցելու համար Աննա Ծառուկյանը պատրաստվում է դիմել արդարադատության նախարարին. «Խնդիր եմ տեսում, կան բեկանումներ վերաքննիչ դատարանում, ստանդարտ ձեւակերպումներով, տնային կալանքը հիմնականում վերաքննիչը բեկանում է»:
Հայաստանի Հանրապետությունը պետք է հասկանա, որ եթե տնային կալանքը որոշակի ռիսկեր չի պարունակում, եկեք դա օրենսդրությունից հանենք, դա հոգեբանական տարր է, խտրականություն անազատության մեջ գտնվողների նկատմամբ:
Եթե 20 միլիոն դրամ գրավը դատարանը դիտարկեց, որ դրանով կկանխվի փախուստը, ապա վերաքննիչ դատարանը դիտարկեց, որ չի կարող չեզոքացնել փախուստի ռիսկը, այսինքն, ըստ պաշպանական կողմի, գրավի ինստիտուտն էլ առ ոչինչ է:
Ի դեպ, պաշտպանը չբացառեց, որ կդիմի նաեւ Սահմանադրական դատարան:
Ռուզան ՄԻՆԱՍՅԱՆ
«Առավոտ» օրաթերթ
19.11.2024
