«Ես ուրիշ ակնկալիք չունեի, որովհետեւ ուղղորդված կարգավիճակում են թե՛ դատախազը, թե՛ դատավորը, թե՛ Արարատ Միրզոյանի ներկայացուցիչը: Նրանք իմ երեխու, իմ հանդեպ գործում են միայն ուղղորդված կարգավիճակում: Պատիժը փորձում են իմ երեխու միջոցով անցկացնել, դատարանն էլ վերեւների ակնկալիքը փորձում է ի կատար ածել: Մեր հանրությունը պետք է հասկանա, որ այս ամեն ինչը ամեն մեկի հետ կարող է կատարվել: Ինձնից ու իմ տղուց ոչ մեկ լավը չլինի: Մենք հայր ու տղա ազգն ենք ներկայացրել, ՀՀ-ն ենք ներկայացրել, ՀՀ դրոշն ենք ծածանել: Մենք մեր արարքով այսօրվա դրությամբ, դուրս է գալիս կառավարության հակառակ ենք: Ազգ ներկայացնող անձինք պետք է պատժվեն», -այսօր Երևանի ընդհանուր իրավասության քրեական դատարանի Շենգավիթ նստավայրում Արտաքին գործերի նախարար Արարատ Միրզոյանին ծեծի ենթարկելու գործով հերթական դատական նիստից հետո լրագրողներին ասաց մեղադրյալ Թորգոմ Ասատրյանի հայրը՝ Նորայր Ասատրյանը՝ անդրադառնալով որդու կալանքի ժամկետի երկարաձգման վերաբերյալ որոշմանը:
Հիշեցնենք, որ Արարատ Միրզոյանը ծեծի է ենթարկվել 2020թ. նոյեմբերի 9-10-ի գիշերը, երբ Նիկոլ Փաշինյանը ստորագրեց կապիտուլյացիոն փաստաթուղթը: Գործով մեղադրյալ Թորգոմ Ասատրյանն իրեն մեղավոր չի ճանաչում:
Նորայր Ասատրյանն այսօր դատարանի դահլիճից հեռացվեց նրա համար, որ արձագանքեց մեղադրող դատախազին, որը ներկայացնում էր, որ Ասատրյանն իր եղբոր հետ թշնամական հարաբերություն ունի: Լրագրողների հետ զրույցում Նորայր Ասատրյանը անդրադարձավ նաեւ դրան. «Հենց վատը դա է, այս ժողովրդի մեջ սերմանում են, որ թշնամությունը կարող է ընտանիքի մեջ լինել: Երբ նույն հորից ու մորից ես ծնված, ոնց կարող է այդպիսի պահ լինել, որ եղբայրը եղբոր դեմ թշնամություն ունենա: Ինձ թվում է, որ ադեկվատ ընտանիքում նման բան չկա: Ուզում են ներկայացնել, որ ոչ ադեկվատ ընտանիք ենք ու կարող ենք նման բան թույլ տալ: Մեր ընտանիքը ազգ սիրող ընտանիք է»:
Կարդացեք նաև
Արփինե ՍԻՄՈՆՅԱՆ
