«Կան հստակ ընթացակարգեր եւ կանոններ, ու մեր թիմերը կազմված են կանոնների ու կարգերի խստիվ պահպանմամբ, դա է պատճառը, որ ձեր թվարկած ըմբիշները ներառված չեն Հայաստանի հավաքականի կազմում: Վերջին հաշվով, սրանք զինված ուժերի ֆիզիկական կարողությունների ցուցադրման եւ դրանց բարելավմանն ուղղված առաջնություններ են, ու կարծում եմ պետք է ճիշտ ծառայեն այդ նպատակին»,-լրագրողի հարցին ի պատասխան՝ ասաց ԿԳՄՍ նախարար Ժաննա Անդրեասյանը՝ անդրադառնալով Կ. Դեմիրճյանի անվան մարզահամերգային համալիրում նոյեմբերի 20-22-ը անցկացվելիք Զինվորականների ըմբշամարտի աշխարհի 37-րդ առաջնությունը, որին առանց պատշաճ բացատրության արգելվել է մասնակցել ժամկետային զինծառայության մեջ գտնվող մեր չեմպիոններին:
Նախարարն ասաց, որ որեւէ միտում չկա, ուղղակի պահպանել են կանոնակարգի բոլոր կետերը:
Ինչ վերաբերվում է մեր մարզիկների հայտնած մտահոգությանը, այս մասին էլ նշեց. «Քանի որ անմիջական հաղորդակցության գործընթացը ԿԳՄՍ նախարարությունը չի իրականացրել, այլ Պաշտպանության նախարարության գործընկերները, մանրամասներ չեմ կարող հայտնել: Իհարկե, ես հասկանում եմ մեր մարզիկների ցանկությունը, որ ուզում են ամեն կերպ աջակցել եւ մասնակցել այն բոլոր մրցաշարերին, որոնք Հայաստանի ներկայություն են պահանջում: Դա շատ գնահատելի է, բայց ընթացակարգերն ավելի կարեւոր են: Մենք պետք է ապահովենք միջազգային չափանիշներին համապատասխան առաջնության կազմակերպումը մեր երկրում եւ դա անելու ենք»:
Գոհար ՀԱԿՈԲՅԱՆ
