«Սա հարկային տեռոր է։ Եկեք իրերը կոչենք իրենց անուններով»,- ՀՀ ԱԺ նիստերի դահլիճում Տնտեսական հարցերի մշտական հանձնաժողովի որոշմամբ անցկացվող խորհրդարանական լսումների ժամանակ հայտարարեց փաստաբան Արշավիր Խալափյանը։
Քննարկվում է «Հայաստանի Հանրապետության հարկային օրենսգրքում լրացումներ եւ փոփոխություններ կատարելու մասին» եւ ««Հայաստանի Հանրապետության հարկային օրենսգրքում փոփոխություններ կատարելու մասին» 2024 թվականի հունիսի 12-ի ՀՕ-285-Ն օրենքում լրացումներ կատարելու մասին» օրենքների նախագծերի փաթեթը: Խոսքը վերաբերում է մասնագիտական ծառայությունների ոլորտը շրջանառության հարկի ռեժիմից ընդհանուր հարկման համակարգ տեղափոխելու նախաձեռնությանը:
Ըստ Արշավիր Խալափյանի՝ թեև հայտարարում են ավելի արդար հարկման համակարգի ձևավորման մասին, բայց ունքը բուժելու փոխարեն աչքն են հանում․ «Խոսում եք փաստաբանների եկամուտների մասին։ Կա մի փոքր խումբ, որի համար անկախ նրանից՝ ինչ օրենք ընդունվեց, իրենց չի վնասելու, բայց մեզ նմաններին՝ մանր ու միջին խավերին սպասարկող փաստաբանական գրասենյակներին, վնասելու է․ մենք հայտնվելու են փակման վտանգի առաջ։ Մենք պետք է գնանք վարկեր վերցնենք, որ այդ հարկերը վճարենք․ ո՞նց եք մտածել»։
Ըստ փաստաբանի՝ այս իրավիճակի հետևանքով տուժելու են քաղաքացիները։ Նա վրդովվեց․ «Մանր ու միջին խավերը կներեք, այս բառապաշարի համար, «աբրաշյատսա» են լինելու քրեական ենթամշակույթի ներկայացուցիչներին։ Հող ենք նախապատրաստում հարց լուծողների ինստիտուտի զարգացման, հզորացման համար»։
Կարդացեք նաև
Փաստաբանն ասաց, որ այնպիսի տպավորություն ունի, որ մի անտեսանելի ձեռք, մի անտեսանելի ձայն կառավարությանը հուշում է ժամանակ առ ժամանակ կանոնավոր հաճախականությամբ, պարբերականությամբ այնպիսի նախաձեռնություններով հանդես գալ, որի արդյունքում հանրության դժգոհության աստիճանն ավելի է բարձրանում։
Արշավիր Խալափյանը հորդորեց հետաձգել այս նախաձեռնությունը, ծավալել շահագրգիռ քննարկումներ․ «Հինգ տոկոսը ճիշտ չեք համարում, խելամիտ ձևով բարձրացրեք։ Տրամաբանության մեջ չի տեղավորվում»։
Տաթև ՀԱՐՈՒԹՅՈՒՆՅԱՆ
