ՔՊ նախկին պատգամավոր, ԵԽԽՎ–ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան գրառումը
Երևանում կայանալիք Բանակայինների Աշխարհի առաջնությանը Եվրոպայի ու աշխարհի չեմպիոնությունը վաստակած հայ ըմբիշներին մրցույթից դուրս թողնելը ևս բխում է Փաշինյանի «խեղճիզմի» քաղաքականությունից։ ՊՆ համապատասխան ներկայացուցիչն այդպես էլ չկարողացավ որևէ տրամաբանական բացատրություն տալ, թե ինչու են այդպես վարվել։ Ի՞նչ տրամաբանական բացատրություն պետք է լինի դրան, երբ դու մրցումներից դուրս ես թողնում քո ուժեղագույն մարզիկներին։ Ստացվում է՝ դու հաղթել չես ուզում կամ առնվազն նվազեցնում ես հաղթելու հնարավորությունները։
Համատարած արժեզրկման, ազգային արժանապատվության ոտնահարման շրջանակներում հայ հանրության համար առանձնահատուկ նշանակություն ունեն հայ մարզիկների հաջողությունները, չէ՞ որ ՀՀ դրոշի ծածանումը, ՀՀ հիմնը հնչելը՝ դրանք ազգային արժանապատվության զգացողության վրա ազդող և ոգևորող գործոններ են։ Ես նույնիսկ չեմ անդրադառնում այն հանգամանքին, որ այդ մրցույթին ներկա կլինեն հարևան հակառակորդ երկրի ներկայացուցիչներ։ Ինձ համար ուղղակի ակներև է, որ Փաշինյանի համար պարտությունը պետք է դարձնել օրինաչափ, ոչ թե նեղվել, ամաչել, փորձել փոխվել, այլ դարձնել ընդունելի, իսկ հաղթանակը, անգամ՝ մարզական ոլորտում, հակասում է «խեղճիզմի» ու թուլության քարոզին, դրա համար ուղղակի պետք է խաղից դուրս թողնել ուժեղներին ու հաղթողներին․․․
