Արցախից բռնի տեղահանված մեր հայրենակիցների համար ինչո՞ւ սահմանված չէ հատուկ սակագին․ հարցն այսօր Երեւանի ավագանու նիստում «Մայր Հայաստան» խմբակցության անդամ Մեսրոպ Մանուկյանն ուղղեց փոխքաղաքապետ Սուրեն Գրիգորյանին, երբ վերջինս ներկայացնում էր տրանսպորտի սակագնից օգտվողների արտոնությունները։ Ըստ այդմ, 20 տոկոս զեղչ տրամադրվում է դպրոցականներին եւ նպաստառու ընտանիքների անդամներին, 15 տոկոս՝ ուսանողներին, 30 տոկոս՝ թոշակառուներին, ծնողազուրկ ուսանողներին՝ անվճար, հաշմանդամություն ունեցող անձանց՝ 1-ին կամ 2-րդ խմբի, կամ նոր դասակարգմամբ՝ խորը կամ ծանր, կլինի անվճար, պետական խնամքի տակ գտնվող, մանկատներում կամ ծերանոցներում գտնվող անձանց՝ անվճար, նախկին ԽՍՀՄ հերոսներ, սոցիալիստական աշխատանքի հերոսներ, Հայաստանի ազգային հերոսներ, Մարտական խաչի առաջին և երկրորդ աստիճանի և Փառքի երեք աստիճանի շքանշաններով պարգևատրված անձանց նույնպես՝ անվճար, բազմազավակ ընտանիքների ծնողներին նույնպես անվճար կլինի:
«Երբ պարոն Գալջյանն ասում է արտոնություն, զեղչ․․․ հասկանում եմ, որ իրավաբանական հեռակա սովորել է, երեւի չի սովորել․․․ ավագանին հելնի երկինք, իջնի գետին, չունի զեղչ, արտոնություն սահմանելու լիազորություն։ Սա կոնկրետ սակագնի սահմանում է, այսինքն, այս կատեգորիայի համար սահմանում եք ուրիշ գին։ Եվ մի փորձեք քաղաքացների վրա լավություն ծախել»,- ասաց Մեսրոպ Մանուկյանը։
Նա հետաքրքրվեց նաեւ՝ ազատամարտիկներին տրանսպորտի արտոնություններից զրկելու մասին։
Սուրեն Գրիգորյանը պատասխանեց, որ արցախցիներին օգնությունների մասով կենտրոնական իշխանությունը բազմաթիվ ծրագրեր իրականացրել եւ իրականացնում է․ «Թույլ տվեք կասկածել ձեր մեծ անհանգստությանը, քանի որ դուք նախագծից վաղուց տեղյակ եք եղել եւ համապատասխան առաջարկ չեք ներկայացրել»։
Կարդացեք նաև
«Երկրապահների մասով էլ խուսափեցիք պատասխանել»,- Սուրեն Գրիգորյանի ելույթից հետո արձագանքեց Մեսրոպ Մանուկյանը՝ խոստանալով իր ելույթում անդրադառնալ իշխանության մանիպուլյացիաներին։
«Ձեր ելույթներն իմ էմոցիոնալ ֆոնի վրա չեն ազդում՝ ոչ դրական, ոչ էլ բացասական իմաստով»,- արձագանքեց Սուրեն Գրիգորյանը։
Մանրամասները՝ տեսանյութում
Թեման շարունակեց «Մայր Հայաստան» խմբակցության ավագանի Արշակ Սարգսյանը՝ Սուրեն Գրիգորյանից հետաքրքրվելով․ «Երբեւէ տեսե՞լ եք, որ անչափահասը կամ զինվորականը վճարի երթեւեկելու համար․ պոպուլիզմով եք զբաղված»։
Մանրամասները՝ տեսանյութում
Նելլի ԳՐԻԳՈՐՅԱՆ
