Ռազմավարական եւ ազգային հետազոտությունների հայկական կենտրոնը, որ 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը, արդեն 30 տարեկան է: Կենտրոնի հիմնադրման հոբելյանի առիթով ընդունելություն էր կազմակերպվել, որին ներկա հասարակական-քաղաքական գործիչներ, դիվանագետներ, հոգեւոր դասի ներկայացուցիչներ եւ բարեկամներ:
«30 տարի առաջ Ռիչարդ Հովհաննիսյանի մտահղացմամբ, Տիգրան Հայրապետյանի ստեղծագործական ջիղով, կազմակերպչական ունակությամբ, ներկա գտնվող եւ նաեւ այժմ բացակայող հիմնադիր փորձագետներով հիմնադրվեց Ռազմավարական կենտրոնը՝ ՀՀ առաջին անկախ հետազոտական կենտրոններից մեկը, որը փորձեց քաղաքական մշակույթ ստեղծել եւ ունեցավ ածանցյալներ, մշակույթ, որը հիմնված էր ինտեգրալության, ամբողջականության եւ բազմաղբյուր մոտեցման վրա, ինչպես նաեւ անկախության վրա»,- ասաց կենտրոնի հիմնադիր, «Ժառանգություն» կուսակցության առաջնորդ Րաֆֆի Հովհաննիսյանը:
Կարդացեք նաև
Նա փաստեց, որ Ռազմավարական եւ ազգային հետազոտությունների հայկական կենտրոնը երբեք չի ենթարկվել որեւէ ազդեցության՝ անհատի, անգամ հիմնադրի. «Կենտրոնը երբեք չի շեղվել անկախության իր սկզբունքից, ինչպես նաեւ այն հավատամքից, որ Հայաստանի Հանրապետությունը վերջապես պետք է ունենա ինստիտուցիոնալ քաղաքականաստեղծ աշխատանք, ոչ թե անձնակենտրոն, ոչ թե իշխանաենթակա, իրավիճակային, փոփոխական կամ հեռախոսային»:
Րաֆֆի Հովհաննիսյանը փաստեց. « Ռազմավարական կենտրոնը անգամ ամենադժվարին պայմաններում չի վաճառվել, չի վաճառվել ոչ ուղղակի, ոչ էլ փոխաբերական իմաստներով»:
Մանրամասները՝ տեսանյութում
Գոհար ՀԱԿՈԲՅԱՆ
