Երեւանի ավագանու «Մայր Հայաստան» խմբակցության անդամ Մեսրոպ Մանուկյանը եթերում ցուցադրել է մայրաքաղաքի կենտրոնում իրականացված բարեկարգման անորակ աշխատանքները:
Մասնավորապես, օրերս ասֆալտապատված Թումանյան փողոցում, որտեղ արդեն նշագծումներն էլ են կատարվել, Մեսրոպ Մանուկյանը ուշադրություն հրավիրեց դիտահորերի վրա: «Իրենք չեն հասկացել, որ այստեղ դիտահոր պիտի լինի եւ այդ դիտահորը իրենք պետք է փոխեին: Այսինքն, պետք է տեղադրեին դիտահորը, ավարտեին ամբողջությամբ, որից հետո ասֆալտն ու գծանշումներն անեին: Սա աշխատանքների լրիվ ձախողում է»,-ասել է նա:
Այնուհետեւ ավագանու անդամը ցույց է տալիս հեղեղատար համակարգը՝ նշելով. «Չկա մի մարմին, որը կվերահսկի, կասի` տղերք, որ բերում ու սաֆալտախառն լցնում եք այստեղ, հետագայում հեղեղումների ու «Վենետիկի» պատճառ է դառնալու: Եվ իրենց ապաշնորհ պլանավորման արդյունքում ստիպված են լինում բյուջեից կրկնակի ծախս անել: Այսինքն, իմ, ձեր վճարած հարկերից մենք ստիպված ենք լինում վճարել կրկնակի»:
Աբովյան-Թումանյան խաչմերուկում Մեսրոպ Մանուկյանն արձանագրում է նաեւ ասֆալտապատումից հետո կաբելներ անցկացնող Երեւանի «Քաղլույսի» սկսած ու անավարտ կամ կիսատ թողած աշխատանքները, որոնք նաեւ վտանգավոր են: «Իշխանությունը նույն գործը երկու անգամ անում է: Դա կամ տգիտություն է՝ կառավարման ապաշնորհություն, կամ փողեր լվալու տեղ է: Ինչո՞ւ, որովհետեւ բոլորս էլ շատ լավ գիտենք, որ ամենաշատ փողը ասֆալտի մեջ է: Ինչքանո՞վ է նորմալ, որ փողոցը ասֆալտապատում եք, հետո որոշում եք, որ այդտեղ պետք է հեղեղատար համակարգ լինի»,- հարցնում է ավագանու անդամը:
Կարդացեք նաև
Ուշադրությունից չեն վրիպում նաեւ տոմետները, որոնք ավագանու անդամը կարողանում էր մատով տեղահան անել: «Այս գործի մեջ միակ պարկեշտ անձնավորությունը քաղաքապետարանի մամլո խոսնակն է, որը նախապես ասում է, որ այսինչ օրը անձրեւ է գալու, տնից դուրս չգաք, թե չէ կխեղդվեք: Նայեք, ես նախապես զգուշացրել եմ»,-հեգնում է Մեսրոպ Մանուկյանը ու աչք ծակող այլ խախտումներ արձանագրում նաեւ կենտրոնի այլ փողոցներում:
Աշոտ ՀԱԿՈԲՅԱՆ
