Ծանրամարտի Հայաստանի տղամարդկանց եւ կանանց ազգային հավաքականները, համապատասխանաբար, Երեւանի «Օլիմպավանում» եւ Գյումրիում նախապատրաստվում են դեկտեմբերի 6-ից 15-ը Թաիլանդի մայրաքաղաքում կայանալիք աշխարհի առաջնությանը:
Տղամարդկանց ընտրանու կազմում մրցավայր մեկնելու է 10 ծանրորդ. 61 կգ՝ Գառնիկ Չոլակյան, 73 կգ՝ Գոռ Սահակյան, 89 կգ՝ Անդրանիկ Կարապետյան, 96 կգ՝ Դավիթ Հովհաննիսյան եւ Հակոբ Մկրտչյան, 102 կգ՝ Արա Աղանյան, 109 կգ՝ Գարիկ Կարապետյան եւ Պետրոս Պետրոսյան, +109 կգ՝ Վարազդատ Լալայան եւ Սիմոն Մարտիրոսյան:
Կանանց հավաքականի գլխավոր մարզիչ Արտաշես Ներսիսյանը Aravot.am-ին ասաց, որ առայժմ հայտնի է միայն 55 կգ քաշային Ալեքսանդրա Գրիգորյանի անունը: Իսկ թե նրանից բացի էլ ո՞վ կկարողանա մեկնել Թաիլանդ, պարզ կդառնա եկող շաբաթվա ընթացքում հավակնորդների համար ծանրաձողին ստուգողական մոտեցումներ կազմակերպելու ժամանակ գրանցվելիք արդյունքներից:
Աշոտ ՀԱԿՈԲՅԱՆ
