Ֆիզիկական կուլտուրայի հայկական պետաական ինստիտուտում այսօր կազմակերպվել էր միջոցառումների շարք՝ «Ուժի եւ գիտության խաչմերուկում» խորագրով: Նախասրահում բուհի մասնագիտական ամբիոններն առանձին տաղավարներում ներկայացրին գիտության ոլորտում ունեցած իրենց ձեռքբերումները, ներկայացվեցին նաեւ «Սպորտ ԿԱԲ» գիտահետազոտական կենտրոնի գիտահետազոտական եւ աշխատանքային հնարավորությունները: Իսկ վերջում մանկավարժական գիտությունների դոկտոր, պրոֆեսոր Ֆրունզ Գաբրիելյանը ինստիտուտի գրադարանում խոսեց սպորտային մանկավարժություն գիտության ձեռքբերումների մասին:
Միջոցառման ավարտին ՀՖԿՍՊԻ ռեկտորի ժամանակավոր պաշտոնակատար Տիգրան Սիմոնյանը Aravot.am-ին ասաց. «Միջոցառումը կազմակերպել ենք գիտության համաշխարհային օրվա առիթով: Գիտությունն ուժ է ցանկացած երկրի համար: Դա այն ուժն է, որը երկիրը տանում է առաջ, երկիրը դարձնում է ճանաչելի:
Կոնկրետ մեր ինստիտուտի պարագայում դա սպորտային գիտությունն է, որը մենք շատ կարեւորում ենք: Ցավոք, սպորտային գիտությունը Հայաստանում բավականին բացեր ունի, եւ մենք որպես ոլորտային բուհ միակն ենք Հայաստանում եւ փորձում ենք լրացնել եւ զարգացնել այն: Մշտապես նոր մարտահրավերներ են առաջ գալիս եւ ոչ միայն սպորտային գիտությունը, այլեւ հարակից ոլորտները սպասարկող գիտությունները պետք է զարգանան: Եթե մենք ուզում ենք բարձրագույն նվաճումների հասնել սպորտում, ապա դրանք պետք է լավ հիմքի վրա դրված լինեն հենց գիտության տեսքով:
Տեսեք, ցանկացած նվաճում, որ հիմա ունենք, մարզիկների եւ մարզիչների էնտուզիազմի հաշվին է: Բայց մենք չունենք սպորտային հոգեբանություն, սպորտային բժշկություն, սպորտի կառավարում: Եվ դրանք հիմա զարգացնում ենք: Այս պահին պայմանագրեր ունենք կնքած տարբեր երկրների առաջատար համալսարանների ու կենտրոնների, մասնավորապես, Սոչիի միջազգային օլիմպիական համալսարանի հետ, որի հեղինակավոր մասնագետները կգան, այստեղ, սպորտի կառավարման դասընթացներ, մեր մասնագետների վերապատրաստում կկազմակերպեն: Թարմացրել եւ թարմացնում ենք մեր պայմանագրերը նաեւ այլ երկրների մեր գործընկերների հետ, որոնցով նախատեսվում է մասնագետների եւ ուսանողների փոխանակումներ իրականացնել: Ընդ որում, ցանկանում ենք կազմակերպել այնպես, որ նրանք տեսական գիտելիքները մեր շրջանավարտներին փոխանցեն այստեղ, իսկ հետո արդեն կկազմվեն խմբեր, որոնք գործնական մասը կյուրացնեն իրենց մոտ»:
Կարդացեք նաև
Պարոն Սիմոնյանը կարեւորեց համագործակցությունը նաեւ հայաստանյան բուհերի հետ: Օրինակ, սպորտային բժշկության մասով Երեւանի բժշկական համալսարանի մասնագետները կդասավանդեն ՀՖԿՍՊԻ-ում, իսկ իրենց ուսանողները պրակտիկ գիտելիքները կյուրացնեն բժշկական համալսարանի բազայի վրա:
Ինստիտուտի ուսումնագիտական գծով պրոռեկտոր Հասմիկ Ավագյանը հավելեց, որ ՀՖԿՍՊԻ-ն սպորտային մանկավարժություն գիտության ոլորտը կրողն ու զարգացնողն է եւ որ առանց տեսական կողմի անհնար է պատկերացնել ուժ, առանց ուժի՝ գործնական արդյունք: «Այսօրվա միջոցառման գլխավոր նպատակներից մեկը եղել է ՀՀ-ում գործող մարզական ակումբներին, դրանցում պրակտիկ գործունեություն ծավալող սպորտային բժիշկներին, ֆեդերացիաներին մեր մարզական օջախ հրավիրելը: Մեր ամբիոնները ներկայացրին գիտահետազոտական աշխատանքներ իրականացնելու ինստիտուտի հնարավորությունները: Արդյունքում արդեն եղածներին ավելացել են նեղ ոլորտային համագործակցության նոր առաջարկություններ, որոնք ընդունվել են»,-ասաց նա:
Տիկին Ավագյանը նաեւ հավելեց, որ ինստիտուտը ակադեմիական մակարդակով լուրջ քայլեր է ձեռնարկում սպորտային իրավունքի կրթական ծրագիր ներդնելու ուղղությամբ, մի ուղղություն, որը Հայաստանում բացակայում է: «Այս ոլորտի աշխարհի լավագույն մասնագետներն են մեր բուհի աշխատակազմից վերապատրաստել ութ դասախոսի, որոնք անմիջական առնչություն ունեն եւ սպորտի եւ իրավունքի հետ»,-ասաց նա:
Աշոտ ՀԱԿՈԲՅԱՆ
