«Ես անձամբ խնդիրներ տեսնում եմ ու պետական իրավասու մարմիններին բազմիցս տարբեր՝ այդ թվում, թե բանավոր, թե գրավոր ձեւաչափով հաղորդակցել եմ տարբեր տեսակի խնդիրներ: Մասնավորապես, եթե այս տարվա մասին ենք խոսում, դրանք կապված են եղել տարբեր հանրային սննդի օբյեկտների, շինարարության օբյեկտների հետ: Անմիջապես տեղեկատվությունը փոխանցել ենք ու հաղորդակցել ենք իրավասու մարմիններին… այո՛, պիտի այս պահին որպես մարդու իրավունքների պաշտպան արձանագրեմ, որ մեր հանրապետությունում մարդիկ չպետք է լինեն, որ իրենց զգան արտոնյալ, ընդ որում՝ կապ չունի երիտասարդներ են, ներկա, թե նախկին իշխանությունների ներկայացուցիչներ են»,- այսօր լրագրողների հետ զրույցում ասաց մարդու իրավունքների պաշտպան (ՄԻՊ) Անահիտ Մանասյանը՝ պատասխանելով հարցին, թե ինչն էր այսօրվա կառավարության նիստում զայրացրել Նիկոլ Փաշինյանին:
Հարց հնչեց նաեւ, թե ուժային կառույցներում խնդիրներ տեսնո՞ւմ է, որ իսկապես մի բան լավ չեն անում, օրինակ` անտեսում են Փաշինյանի խոսքը, ի պատասխան՝ Մանասյանն ասաց. «Ես չեմ կարող հարցի վերաբերյալ մեկնաբանություն տալ: Իմ մանդատի շրջանակում պարզապես պատասխանեմ, որ տարբեր իրավասու մարմինների մոտ տեսնում եմ շատ լուրջ պրոֆեսիոնալիզմի, տարբեր հարցերի վերաբերյալ հմտությունների պակասի խնդիր: Որի առնչությամբ անընդհատ խոսել ու խոսում եմ: Ավելին ասեմ, որ կարծում եմ՝ խնդիրների մի մասը բխում է այն հանգամանքից, որ շատերն ընդհանրապես չունեն պատշաճ գիտելիքներ ու հմտություններ տարատեսակ ոլորտներում: Անհատական դեպքերի մասին չխոսենք, խոսենք համակարգային տեսանկյունից»:
Արփինե ՍԻՄՈՆՅԱՆ
