Այսօրվա կառավարության նիստից հետո առողջապահության նախարար Անահիտ Ավանեսյանին մոտեցավ մի տարեց կին ու գանգատվեց իր առողջական վիճակից:
Նախարարը ուղղորդում էր դիմել բուժհաստատություններ:
«Իմ նյարդային համակարգը էդ խելագարը խախտել է, մարդասպան հանցագործը, մեռելներից էլ է փող վերցնում: Ես իրեն հանգիստ չեմ թողնելու»,- ասաց տարեց կինը ու ինքնազգացողությունը վատացավ:
Լրագրողները Ավանեսյանից հետաքրքրվեցին՝ այսօրվա նիստում Նիկոլ Փաշինյանն ինչից էր դժգոհ:
Կարդացեք նաև
«Դե ես կարծում եմ, որ մշտապես պետք է ուշադիր լինել, թե փոփոխությունների նկատմամբ քաղաքացիների մոտ ինչպիսի վերաբերմունք կա: Վարչապետն էլ բարձրաձայնում էր, որ արդարության ընկալման մասով քաղաքացիների գոհունակությունը բավարար չէ, ու մենք պետք է ամեն ինչ անենք, որ այդ գոհունակությունը բարձրանա: Պետք է անել ավելի շատ ու ժամկետների մեջ»,- պատասխանեց նախարարը:
Հաջորդ հարցին, թե վարչապետի խոսքը լուրջ չի՞ ընդունվում կառավարության անդամների կողմից, թե մատների արանքով են նայում նրա ասածներին, որ այսօր դժգոհում էր, թե իր համբերության բաժակը լցվել է, ի պատասխան Ավանեսյանն ասաց. «Վարչապետն այսօր հստակ հանձնարարականներ տվեց, ավել մեկնաբանելու որեւէ բան չունեմ» :
Արփինե ՍԻՄՈՆՅԱՆ
