«Ես հեռու եմ այն մտքից, որ իմ գործունեությամբ ես պետք է ապացուցեմ, որ ՀԷՑ-ը մեր երկրի թշնամիներից մեկն է։ Նման բան չկա»,- խորհրդարանում Հանրային ծառայությունները կարգավորող հանձնաժողովի նախագահի պաշտոնում իր թեկնածության քննարկման ժամանակ ասաց ՔՊ-ի առաջադրած թեկնածուն՝ ԵԿՄ նախագահ Սասուն Միքայելյանի բարեկամ Մեսրոպ Մեսրոպյանը։ Նա պատասխանում էր ՔՊ-ական Արփի Դավոյանի հարցին։
Լուսանկարը՝ Գագիկ Շամշյանի
Նա հավելեց՝ ՀԷՑ-ը մասնագիտացված կառույց է, որը տարիներ շարունակ արդյունքներ է ապահովել, այլ հարց, որ դրանցից դժգոհ ենք՝ եւ արդարացիորեն։
Մանրամասները՝ տեսանյութում
Կարդացեք նաև
ՀԷՑ-ի, Հանրային ծառայությունները կարգավորող հանձնաժողովի նախկին նախագահ՝ կրկին ՔՊ-ի կողմից առաջադրված Գարեգին Բաղրամյանի հրաժարականի, Մեսրոպ Մեսրոպյանի առաջադրման կապի մասին խոսակցությունները հարցուպատասխանի ձեւաչափից տեղափոխվեցին ելույթների հարթություն։ «Հայաստան» խմբակցության պատգամավոր Ագնեսա Խամոյանը նկատեց՝ մամուլը գրել է, որ այս իշխանությունները ՀԷՑ-ը ցանկանում են խլել դրա ներկայիս սեփականատեր, ռուսաստանաբնակ գործարար Սամվել Կարապետյանից։
«Կարո՞ղ ենք հետեւություն անել, մտահոգություն ունենալ, որ Նիկոլ Փաշինյանը երբ ձեզ առաջարկել է այս ապաքաղաքական պաշտոնը, նաեւ պայման է դրել՝ խլել ՀԷՑ-ը։ Կարող ենք»,- ասաց նա։
Մանրամասները՝ տեսանյութում
Ընդդիմադիրների՝ Մեսրոպ Մեսրոպյանի քաղաքական հայացքների մասին հարցերին էլ իր ելույթում հակադարձեց ՔՊ-ական պատգամավոր Արման Եղոյանը։ Նա՝ դիմելով ՀՅԴ-ականներին, ասաց, որ Հանրային ծառայությունները կարգավորող հանձնաժողովի անդամ է դաշնակցական Արա Նռանյանն, որն ընտրվել է այս խորհրդարանի կողմից։
Մանրամասները՝ տեսանյութում
Ավելի ուշ, իր ելույթում, ՔՊ-ական Սերգեյ Բագրատյանն էլ հայտարարեց՝ քաղաքացիների հետ հարաբերություններում պատասխանատվությունը կրում է պետությունը, տվյալ դեպքում՝ իշխող ՔՊ-ն ու քաղաքացուն չի հետաքրքրում, թե ՀԷՑ-ի սեփականատերն ո՞վ է, ինչպե՞ս է կառավարում, հետաքրքրում է, որ պետությունն իր պարտավորությունները որակյալ եւ ժամանակին մատուցի։ Նա նաեւ հավելեց՝ որեւէ մեկին հաճելի չէ, որ կառավարության նիստի ժամանակ հոսանքազրկվում է տարածքը։
Նելլի ԳՐԻԳՈՐՅԱՆ
