«Շուտով կամփոփենք 2024թ, եւ այս 5 գործերի՝ Զինված ուժերում ոչ մարտական պայմաններում ծառայելու ընթացքում զոհված զինծառայողներ Տիգրան Օհանջանյանի, Վալերիկ Մուրադյանի, Արթուր Ղազարյանի, Անդրանիկ Մկրտչյանի, Լևոն Թորոսյանի գործերի վերաբերյալ պետք է նշեմ, որ հիմա շատ ավելի վատ, անմխիթար վիճակ ունենք, քան օրինակ 2022 կամ 2023 թվականն ամփոփելիս»,- Մեդիա կենտրոնում՝ «Ոչ մարտական պայմաններում զոհված զինծառայողների գործերով քննություն․ ի՞նչ գործողություններ են արվել 2024-ին» թեմայով ասուլիսի ժամանակ նշեց «Հելսինկյան ասոցիացիա» իրավապաշտպան ՀԿ-ի փաստաբան, իրավահաջորդների ներկայացուցիչ Արայիկ Պապիկյանը:
«Որքան հեռանում ենք, այնքան ավելի ակնհայտ է դառնում, որ այն անձինք եւ պաշտոնյաները, որոնք պետք է ապահովեին քննության արդյունավետությունը, բացարձակապես շահագրգիռ չեն դրանում: Խոսքը հատկապես վերաբերում է ՀՀ գլխավոր դատախազությանը՝ հանձին գլխավոր դատախազ Աննա Վարդապետյանի:
Ես կարող էի նշել նաեւ քննչական կոմիտեին՝ նախագահ Արգիշտի Քյարամյանի մասնակցությամբ, բայց եթե դատախազական հսկողությունը եւ շահագրգռությունը բացակայում են, ապա քննչական կոմիտեի քննիչներն ընդհանրապես հետաքրքրված չեն այս գործերով ինչ-որ բան անելու համար: Տարվա ընթացքում տիկին Վարդապետյանը հրապարակայնորեն 3 անգամ անդրադարձել է այս 5 գործերին՝ 2 անգամ ԱԺ բարձր ամբիոնից եւ մեկ անգամ Ստրասբուրգում, երբ քննարկում էր, ու տիկին Վարդապետյանը հատկապես ընդգծել է, որ վարչապետի ստեղծած աշխատանքային խմբում ոչ մարտական պայմաններում ծառայելու ընթացքում զոհված զինծառայողների խնդիրը կարեւոր է: Բազմաթիվ պաշտոնյաների ներկայությամբ դրանով ի ցույց է դրել, որ Հայաստանը շահագրգիռ է այս խնդիրները լուծելու»,-ասաց Պապիկյանը:
Կարդացեք նաև
Ապա դիմեց ՀՀ գլխավոր դատախազին. «Տիկին Վարդապետյան, երբ թեման ներկայացնում եք Ստրասբուրգում կամ ԱԺ-ում, բարի եղեք նշել նաեւ, որ ոչինչ չեք անում այս գործերի բացահայտման համար: Ձեր ենթակա դատախազները եւ նրանց հսկողության տակ գտնվող քննիչներն ընդհանրապես անգործություն են ցուցաբերում: Երբ դուք ԱԺ ամբիոնից ինչ-որ արտահայտություններ եք անում այս գործերի վերաբերյալ, ապա խնդրում եմ՝ բարի եղեք ճիշտն ասել: Մենք եւ իրավահաջորդները լայն հնարավորություն չունենք այդ ամենի մասին հանրությանը տեղյակ պահելու, իսկ դուք ունենալով այդ հնարավորությունը՝ չարաշահում եք ձեր այդ իրավունքը»:
Գոհար ՀԱԿՈԲՅԱՆ
Լուսանկարները՝ «Մեդիա» կենտրոնի
