«Միակ դեպքը, որ կարելի է շեղվել օրակարգից, դա Դաշնակցության 004 շրջաբերականի մասին խոսելուց է»,- խորհրդարանում, Հանրային ծառայությունների հանձնաժողովի նախագահի պաշտոնում ՔՊ-ի ներկայացրած՝ Մեսրոպ Մեսրոպյանի թեկնածության քննարկման ժամանակ, հայտարարեց ԱԺ փոխնախագահ Ռուբեն Ռուբինյանը։
«Հայաստան» խմբակցության պատգամավոր Արթուր Խաչատրյանն ընդառաջ գնաց Ռուբեն Ռուբինյանին եւ պարզաբանեց շրջաբերականի ոդիսականը․ «Իրավապահ մարմինները խուզարկել են կուսակցության գրասենյակը, ինչ-որ թղթեր են հանել, որոնք հայտնվել են ինչ-որ լրատվամիջոցների տիրապետության ներքո։ Ո՞նց է դա եղել՝ ժողովրդավարության բաստեոնն այդ հարցին պատասխան չունի։ Ճիշտ այնպես, ինչպես պետաիրավական հանձնաժողովի տհաճ միջադեպը ԱԺ-ից հայտնվեց լրատվամիջոցի տիրույթում։ Ժողովրդավարության բաստեոնը այդ հարցերին էլ պատասխան չունի, ունենաք՝ կասեք, պարոն Ռուբինյան»։
Իր ելույթում Արթուր Խաչատրյանը պնդեց, որ այդ փաստաթուղթը նորագույն տեխնոլոգիաների օգնությամբ փոփոխության է ենթարկվել ու այդպես է ներկայացվում։ Նա հեգնեց, որ նույն փաստաթղթում 124-ից մի քիչ քիչ, բայց 10-ից ավել անգամ գրված է, որ անկախությունը ՀՅԴ-ի համար անսակարկելի արժեք է։
Արթուր Խաչատրյանի ելույթն ուղեկցվում էր դահլիճից արձագանքներով, փոխադարձ մեղադրանքներով եւ լեզվակռիվներով։
Կարդացեք նաև
«Թողեք խոսա, սենց չի կարելի»,- ընդդիմադիր գործընկերոջն օգնության հասավ Ռուբեն Ռուբինյանը։
Մանրամասները՝ տեսանյութում
Նելլի ԳՐԻԳՈՐՅԱՆ
