«Ոչ մոտ ապագայում չեմ կարող պնդել, հաստատել կամ հերքել Ադրբեջանից գազի ներկրումը․ դա իմ որոշելիքը չէ այս պահին եւ եթե ընտրվեմ՝ հետագայում ևս»,- խորհրդարանում «Հայաստան» խմբակցության պատգամավոր Աննա Գրիգորյանի հարցին պատասխանեց Հանրային ծառայությունները կարգավորող հանձնաժողովի նախագահի՝ ՔՊ-ի ներկայացրած թեկնածու Մեսրոպ Մեսրոպյանը։ Նա հավելեց, որ մեր երկիրը գոյատեւում է 60 տոկոս ներկրվող վառելիքով, որը հիմնականում ՌԴ-ից է ու այդ փաստի հետ հաշվի չնստելն անհնար է։
«Հիմա ֆեյսբուքում ինչ-որ մի գրառում եմ արել, էդ գրառման հետ կապված անընդհատ հարցեր եք ինձ ուղղում․․․ չէ, չեմ ջնջելու, երբեք չեմ ջնջելու, պարզապես մի տեսակ երկընտրանքի առջեւ եմ հիմա՝ ինչպե՞ս պատասխանեմ, որ վաղը լրագրողները կամ մյուս բաները չշահարկեն»,- նեղսրտեց նա։
Օգնության հասավ ԱԺ փոխնախագահ Ռուբեն Ռուբինյանը՝ ասելով․ «Մի պատասխանեք, պարոն Մեսրոպյան։ Մեր սիրելի բարեկամներն ընդամենը ձեզ սադրում են, որ հետո մի հատ թուղթ գրեն՝ ուղարկեն համապատասխան վայր՝ այլ երկրում»։
Գեղամ Մանուկյանը դահլիճից արձագանքեց՝ հեգնելով, թե իշխանությունն էլ Ադրբեջանին է թղթեր ուղարկում։ Ռուբեն Ռուբինյանը հիշեց ՀՅԴ 004 շրջաբերականը․ «Դուք ասեք՝ էդ շրջաբերականը կա՞ր, թե՞ չկար»։
Կարդացեք նաև
Իր եվրոպամետ, թե ռուսամետ լինելու մասին Մեսրոպ Մեսրոպյանն ասաց՝ շատ մարդիկ ռուսամետության դիրքերից կարող են հանդես գալ, բայց բովանդակության մեջ բացարձակ ռուսամետ չլինեն։
Մանրամասները՝ տեսանյութում
Նելլի ԳՐԻԳՈՐՅԱՆ
