«Հուլիսի 12-ին դուք մի այսպիսի գրառում եք արել՝ «Այ անբովանդակ, սրբապիղծ, սադրիչ, սրիկա․ հասա՞ր նպատակիդ, այ փրկիչ»․ ո՞ւմ նկատի ունեք։ Երկրորդ գրառումը ձեր՝ «Կարծում եմ երեկ Բրյուսելում ազդարարվեց Հայաստանում ռուսական նեօգաղութացման ժամանակաշրջանի ավարտը»․ շարունակո՞ւմ եք մնալ այդ կարծիքին»,- այսօր խորհրդարանում, Հանրային ծառայությունները կարգավորող հանձնաժողովի նախագահի հարցի քննարկման ժամանակ, ՔՊ-ի ներկայացրած թեկնածու Մեսրոպ Մեսրոպյանին հարցրեց «Հայաստան» խմբակցության պատգամավոր Ագնեսա Խամոյանը։
Մինչ այդ, ՔՊ-ի թեկնածուի քաղաքական ուժի ներկայացուցիչ լինելու եւ պաշտոնի անհամատեղելիության մասին հարցը Ագնեսա Խամոյանը տվել էր նաեւ ՀՀ տարածքային կառավարման եւ ենթակառուցվածքների նախարար Գնել Սանոսյանին։ Վերջինս պնդել էր՝ Մեսրոպ Մեսրոպյանն ակտիվ քաղաքականությամբ չի զբաղվել, օրենքի պահանջին էլ ընդառաջ գնալով՝ ՔՊ-ից դուրս է եկել։
Մեսրոպ Մեսրոպյանն ու Սուրեն Պապիկյանը
Ագնեսա Խամոյանը Գնել Սանոսյանին նաեւ հարցրել էր՝ ՔՊ-ական ԵԿՄ նախագահ Սասուն Միքայելյանի բարեկամը լինելու հանգամանքն ի՞նչ դերակատարում է ունեցել Մեսրոպ Մեսրոպյանի թեկնածությունն այդ պաշտոնում առաջադրելու հարցում։ Գնել Սանոսյանը պատասխանել էր՝ «Ոչ մի»։
Կարդացեք նաև
Մեսրոպ Մեսրոպյանն ու Սասուն Միքայելյանը
Դիմելով Մեսրոպ Մեսրոպյանին, Ագնեսա Խամոյանը նկատեց, որ վերջինս նաեւ Արամ Զավենի Սարգսյանի մեծ երկրպագուն է եւ նրա հակառուսական տեսակետներով անընդհատ կիսվել է սոցիալական ցանցի իր էջում՝ հավելելով․ «Դուք լինելու եք մի հանձնաժողովի նախագահ, որը գործ է ունենալու ՀԷՑ-ի հետ»։
«Գնահատում եմ ձեր հետեւողականությունը ֆեյսբուքյան իմ էջին»,- արձագանքեց Մեսրոպ Մեսրոպյանը՝ հավելելով, որ օրենքի որեւէ խախտում չի տեսնում իր թեկնածության եւ պաշտոնի անձնագրի պահանջների մասով ու այդ պահանջներին լավատեղյակ է․ «Ո՞վ եմ եղել, ինչպիսի՞ քաղաքական հայացքներ եմ ունեցել՝ դա բացառապես իմ իրավունքն է»։
Մանրամասները՝ տեսանյութում
Նելլի ԳՐԻԳՈՐՅԱՆ
