Գյումրու համայնքապետարանի աշխատակիցների աշխատավարձը վճարվել է։ Այս մասին իր ֆեյսբուքյան էջում տեղեկացրել է Գյումրու ավագանու ՔՊ խմբակցության ղեկավար Քնարիկ Հարությունյանը։
«Գյումրու համայնքապետարանի աշխատակիցների աշխատավարձի խնդիրը կարգավորված է:
Երեկ Կառավարության հետ հարցուպատասխանի ժամանակ վարչապետ Նիկոլ Փաշինյանը հայտարարել էր, որ նրանք ստանալու են իրենց հասանելիք գումարը:
Նոյեմբերի 14-ին արդեն մոտ 2000-ից ավել աշխատակցի աշխատավարձ է վճարվել», -գրել է Քնարիկ Հարությունյանը:
Կարդացեք նաև
Հիշեցնենք, որ «Բալասանյան դաշինքի»՝ իշխանությունից հրաժարվելուց հետո Գյումրու քաղաքապետարանի, ինչպես նաև ՀՈԱԿ-ների աշխատակիցների աշխատավարձը չէր վճարվում այն պատճառով, որ ստորագրող պաշտոնյա չկար։
Նշենք նաև, որ Գյումրու համայնքապետարանում աշխատավարձը շատ ցածր է ու մեկ ամիս չստանալու դեպքում աշխատակիցներից շատերը հնարավոր է և զրկվեն հանապազօրյա հացից։
Չնայած քաղաքը մնացել է առանց իշխանության․ փոխանցումներ չեն կատարվում, քաղաքացիների տարբեր հարցերի լուծում չեն տրվում, սակայն նշենք, որ թե ՛ քաղաքային տրանսպորտն է բնականոն հունով աշխատում և թե՛ կոմունալ ծառայությունն է՝ թեկուզ որոշակի դժվարություններով, իր գործունեությունը շարունակում։
Լուսանկարները հենց դրա վկայությունն են։
Նունե ԱՐԵՎՇԱՏՅԱՆ
