2021թ նոյեմբերից՝ Մուշեղ Հովսեփյանի մահից հետո ԵՊՀ ժուռնալիստիկայի ֆակուլտետի Տպագիր եւ հեռարձակվող լրատվամիջոցների ամբիոնը վարիչ չունի: Տեւական ժամանակ ֆակուլտետի դեկան Նաղաշ Մարտիրոսյանը համատեղում էր դեկանի եւ ամբիոնի վարիչի պաշտոնակատարի պարտականությունները:
Այժմ ավելի քան մեկ տարի է, ինչ ամբիոնի վարիչի պաշտոնակատարի պարտականությունները դրված են ՀՀ քննչական կոմիտեի նախագահ Արգիշտի Քյարամյանի մամուլի քարտուղար Գոռ Աբրահամյանի վրա: Պարոն Աբրահամյանը մինչ այդ Նոր մեդիայի եւ հաղորդակցության ամբիոնում՝ ամբողջական դրույքով դասախոս էր աշխատում, սակայն այնտեղից նրան տեղափոխել են Տպագիր եւ հեռարձակվող լրատվամիջոցների ամբիոն եւ նշանակել պաշտոնակատար:
Aravot.am-ը ԵՊՀ լրատվականից հետաքրքրվեց արդյոք օրենքի խախտում չկա՞ այդտեղ՝ եթե Գոռ Աբրահամյանը միաժամանակ 2 պաշտոն է զբաղեցնում՝ ՀՀ քննչական կոմիտեի նախագահի մամուլի քարտուղարի եւ ամբիոնի վարիչի պաշտոնակատարի: Նաեւ հետաքրքրվեցինք՝ ի վերջո ե՞րբ է կայանալու այդ ամբիոնի վարիչի ընտրությունը, որի ժամկետները վաղուց խախտվել են:
Կարդացեք նաև
ԵՊՀ մամուլի քարտուղար Քնար Միսակյանը հետեւյալը փոխանցեց. «Բարձրագույն եւ հետբուհական մասնագիտական կրթության մասին» ՀՀ օրենքի 15-րդ հոդվածի 8-րդ մասի համաձայն՝ ամբիոնի վարիչի գործունեությունը համարվում է գիտամանկավարժական աշխատանք։ Միաժամանակ տեղեկացնում եմ, որ ԵՊՀ աշխատանքների կազմակերպման գործնական պահանջների եւ ուսումնական գործընթացի անխափան ու պատշաճ կազմակերպման անհրաժեշտությամբ պայմանավորված՝ ԵՊՀ մի քանի ամբիոնների, այդ թվում՝ Տպագիր և հեռարձակվող լրատվամիջոցների ամբիոնի վարիչի թափուր պաշտոնի համալրման մրցույթը նախատեսվում է անցկացնել 2024-25 ուստարվա առաջին կիսամյակի ավարտին (ձմեռային արձակուրդի շրջանում)» ։
Գոռ Աբրահամյանի հետ էլ կապվեցինք, նա ասաց, որ հասցնում է համատեղել պաշտոնները, նաեւ նշեց, որ իբրեւ ԵՊՀ ժուռնալիստիկայի ֆակուլտետի Տպագիր եւ հեռարձակվող լրատվամիջոցների ամբիոնի վարիչի պաշտոնակատար՝ աշխատում է հասարակական հիմունքներով:
Ի դեպ, անցյալ տարվա հունիսին ֆակուլտետի գիտխորհուրդը փորձել էր ամբիոնի վարիչի ընտրություն է կազմակերպել, սակայն պարզվել էր, որ ընտրված թեկնածուն՝ Նանե Վարդանյանը չի համապատասխանել հստակ պահանջներին՝ օրինակ, 5 ուսումնական տարվա ընթացքում ունենալ նվազագույնը 5 հրապարակված գիտական հոդված ` ԲՈԿ-ի կողմից հաստատված ամսագրերից մեկում, հեղինակային մենագրություն եւ այլն: Մյուս թեկնածուն՝ Աստղիկ Ավետիսյանն էլ դիմել ռեկտորատ` ընտրությունը չեղարկելու պահանջով:
Գոհար ՀԱԿՈԲՅԱՆ
