«Բաժանումները՝ Հովհաննես Քաջազնունի, հնչակ, դաշնակցական, կոմունիստ, ռամկավար, ինձ համար անընդունելի են։ Նրանք, ովքեր եղել են 100, 60 տարի առաջ, մեր բոլորինն են՝ լավ ու վատ գծերով, լավ ու վատ արածով։ Այնպես չի, որ յուրաքանչյուրս պետք է իրավունք վերապահենք ու մեզ համարենք Նժդեհի ժառանգորդը, Անդրանիկի ժառանգորդը։ Սիրուն չի, բոլորը մերն են եղել, պայքարել են մեր հայրենիքի համար»,- խորհրդարանում հայտարարեց «Քաղաքացիական պայմանագիր» խմբակցության պատգամավոր Հովիկ Աղազարյանը։ Նա պատասխանում էր «Հայաստան» խմբակցության պատգամավոր Արթուր Խաչատրյանին։ Վերջինս Հովիկ Աղազարյանին զգուշացնում էր՝ «ջանը յուղել», որովհետեւ եթե վաղը ՔՊ-ական կառավարությունը ձախողվեց՝ մեղքը իր վրա են դնելու, իբրեւ նախկին դաշնակցականի։
Հովիկ Աղազարյանը խոստացավ՝ նման բան չի լինելու, ՔՊ-ական կառավարությունը չի ձախողելու․ «Այդպիսի բան տեղի չի ունենա, որովհետև կառավարությունը չի ձախողի։ Այնպես ենք անելու, որ պարոն Աղազարյան Հովիկին հանկարծ ոչ մեկը չդատապարտի»։
Զգացմունքներով պետություն չեն սարքում՝ ընդդիմադիր գործընկերներին ասաց Հովիկ Աղազարյանը։
«Հայաստան» խմբակցության պատգամավոր Գեղամ Մանուկյանը Հովիկ Աղազարյանին հորդորեց՝ Մուսալեռ գյուղ չգնալ, այն եղել է Կիլիկիայի հայկական թագավորությունում։
Կարդացեք նաև
Հիշեցնենք, երեկ խորհրդարանում՝ հակադարձելով ընդդիմությանը, Հովիկ Աղազարյանն ասել էր․ «Մի հատ լավ, զգացմունքային երգ կա՝ «Երթամ, հասնիմ զիմ Կիլիկիա», երբ պատանեկան տարիքում այդ երգը լսում էի, լացում էի, բայց երբ մի քիչ մեծացա, ուսումնասիրեցի էդ դրվագները, հասկացա՝ բայց ինչի՞ համար եմ Կիլիկիայի համար լացում, ինչի՞ եմ անտեղի էներգիա ծախսում։ Կիլիկիան ո՜ւր, ես ո՜ւր։ Կիլիկիան իմ պատմական հայրենիքը չէ, Վանն իմ պատմական հայրենիքն է, Կարսն իմ պատմական հայրենիքն է։ Էն ժամանակ Ձեր նման կրթված, զարգացած, ուժեղ տղերքը թողեցին մեր հայրենիքը, գնացին ուրիշ տեղ, պետություն ստեղծեցին։ Փառք Աստծո, որ դուք չեք թողնում հայրենիքը, պայքարում եք իշխանության գալու համար։ Մենք էլ էդ ամեն ինչը հաշվի առնելով՝ փորձում ենք այնպես անել, որ սխալներ թույլ չտանք, ձեր դիրքորոշումը ճիշտ դիրքորոշում է»։
«Մի քանի հոգի գնացել են խոպան, ուրիշի հողի վրա իբր պետություն են ստեղծել, ես էլ դրա համար պիտի վատ զգա՞մ»,- հեգնեց Հովիկ Աղազարյանը։
Մանրամասները՝ տեսանյութում
Նելլի ԳՐԻԳՈՐՅԱՆ
