«Ադրբեջանը հիմա COP29-ում ոչ միայն «կանաչ լվացում» է անում, այլև «խաղաղության լվացում» է անում ցույց տալու, որ իր կողմից չակերտավոր ազատագրված, էթնիկ զտման ենթարկված տարածքներն օգտագործելու է կանաչ էներգիա ստանալու և բնությունը, շրջակա միջավայրը պահպանելու համար»,-Հայաստանի ամերիկյան համալսարանում անցկացվող «Ադրբեջանի ագրեսիայի ազդեցությունը մարդու իրավունքների և շրջակա միջավայրի պաշտպանության վրա» խորագրով համաժողովի ժամանակ կարծիք հայտնեց «Իրավունքների պաշտպանություն առանց սահմանների» ՀԿ իրավաբան Աննա Մելիքյանը։
Նա փաստեց՝ մարդու իրավունքների խախտումները ռազմական գործողությունների շրջանակում անմիջական կապ ունեն համաժողովի շրջանակում քննարկվող թեմաների հետ։ Աննա Մելիքյանը հայտնեց, որ 2020-ին ինքն ու իր գործընկերները որոշել են փաստահավաք առաքելություն իրականացնել․ «Մենք արձանագրել ենք մարդասիրական իրավունքի լրջագույն խախտումներ, փաստահավաք առաքելություն ենք իրականացրել, այցելել ենք Արցախ։ Իրականում պատերազմական հանցագործները մեր գործը բավականին հեշտացրել էին։ Սոցցանցերում բազմաթիվ էին այն տեսահոլովակները, որոնք պատկերում էին պատերազմական հանցագործություններ, ինչպես քաղաքացիական անձանց՝ այդ թվում՝ ռազմագերիների նկատմամբ։ Դա արվում էր ոչ միայն առանց վախենալու պատասխանատվության ենթարկվելուց, այլև վախեցնելու համար տեղի բնակչությանը, որ գյուղերում մարդ չմնա, զինծառայողները դիմադրություն ցույց չտան։ Շուրջ 80 քաղաքացիական անձանցից, որոնք համարվում են 2020-ին զոհված, նրանց կեսը զոհվել են դիտավորությամբ սպանության պատճառով․ մեծ մասը տարիքով անձինք էին՝ հաշմանդամություն ունեցող, հոգեկան առողջության խնդիրներ ունեցող»։
Իրավաբանը նշեց, որ նաև խոսել են հայրենադարձված գերիների հետ, որոնք պատմել են իրենց նկատմամբ խոշտանգումների, վատ վերաբերմունքի փորձի մասին։
Կարդացեք նաև
Տաթև ՀԱՐՈՒԹՅՈՒՆՅԱՆ
