Վերջին 600 տարիներին մենք, որպես ժողովուրդ, ապրել ենք մեզ պարտադրված, այլ ոչ թե մեր ստեղծած պետության մեջ, ուստի պետության մեր առաջին ընկալումը պարտադրանքն է ու դրա նկատմամբ առաջին ռեակցիան պարտադրանքը թոթափելու ներքին ցանկությունն է․ խորհրդարանում 2025 թվականի պետական բյուջեի նախագծի քննարկման ժամանակ հայտարարեց վարչապետ Նիկոլ Փաշինյանը։
Ընդդիմության ներկայացուցիչների՝ հերոսությունը սահմանը պահող կամավորի ու կամավորության հետ կապելու թեզի մեջ սկզբունքորեն ոչ մի սխալ բան չկա, բայց․ «Այն տարբերությամբ, որ սահմանի պահպանությունը կամավորության հետ կապելը, իսկ հարկ վճարելը ընդամենը «օրենքով սահմանված գործունեության դրսևորում» դիտարկելը կամ դրան հակադրելը ինքնին ապապետական ընկալման հետևանք է։ Եթե խոսքը «Կեցցե մեր հայ կամավորը, գինի լից» երգի կամավորի մասին է, այդ կամավորը գոյություն ունի պետության չգոյության պայմաններում ու այդ կամավորը գոյություն ունի միայն այն պատճառով, որ պետություն գոյություն չունի, այսինքն ՝ այդ երգում նկարագրված կամավորը պետության չգոյության սիմվոլն է»։
Փաշինյանը հավելեց՝ այսօր էլ կամավորներ կան, բայց նրանց գոյությունն ու անհրաժեշտությունը նույնպես պայմանավորված է պետական ինստիտուտների ոչ լիարժեքության հետ․ «Բացի այդ, այսօրվա կամավորը «Ընկեր ջան, գինի լից» երգի կամավորից տարբերվում է նրանով, որ ՀՀ պետական բյուջեից շոշափելի վարձատրություն է ստանում կամավորության համար»։
Մանրամասները՝ տեսանյութում
Կարդացեք նաև
Իր ելույթում Նիկոլ Փաշինյանը նաեւ հայտարարեց՝ Հայաստանը պետք է ունենա նոր Հարկային օրենսգիրք, քանի որ ՀՀ հարկային օրենսգիրքն էլ ապապետական է․ «Մեր Հարկային օրենսգիրքը չի խրախուսում զարգացումը, չի խրախուսում ավելի շատ փող աշխատելը»։
Նելլի ԳՐԻԳՈՐՅԱՆ
