Եվրախորհրդարանում կայացել են Եվրոպական Միության արտաքին հարաբերությունների և անվտանգության քաղաքականության հարցերով բարձր հանձնակատարի պաշտոնի համար Էստոնիայի նախկին վարչապետ Կայա Կալասի թեկնածության հաստատման լսումները, որի ժամանակ Իսպանիայից եվրապատգամավոր Պերնանդո Բառենա Սիլվան անդրադարձել է Արցախի հայաթափմանը։
«Freedom House-ը վերջերս զեկույց հրապարակեց Լեռնային Ղարաբաղի հայերի էթնիկ զտման մասին։ Այս մարմինը (Եվրախորհրդարանը – Ա․Ա․) նույնպես բանաձև էր ընդունել այդ մասին։ Եվրապատգամավորները կոչ արեցին քննել այս հանցագործությունների իսկությունը։ Եվրոպական արտաքին գործողությունների ծառայությունը պատրաստվո՞ւմ է հետաքննություն ձեռնարկել Արցախի քաղաքացիական բնակչության դեմ կատարված ադրբեջանական հանցագործությունները», – հարցրել է Բառենա Սիլվան։
Ի պատասխան՝ Կայա Կալասը համառոտ արձագանք է տվել՝ կարևորելով տարածաշրջանում կայունության առկայությունը և խաղաղության հաստատումը։
«Բայց այստեղ կայունության հարցը չէ միայն։ Կարևոր են նաև տարածաշրջանում տրանսպորտային միջանցքների և էներգետիկ համագործակցության հարցերը։ Ես հանդիպելու եմ կողմերին խաղաղ միջոցներով արդյունքի հասնելու համար», – ընդգծել է էստոնացի գործիչը։
Կարդացեք նաև
Հարցուպատասխանի ձևաչափը արձագանքի հնարավորություն չէր նախատեսում։
Մանրամասներն` այստեղ, սկսած՝ 29:00-ից։
Արսեն ԱՅՎԱԶՅԱՆ
