«Այո, այդ նույն ՀՀ քաղաքացին այսօր, 2018 թվականի ժողովրդավարական հեղափոխությունից հետո, շատ հստակ եւ թափանցիկ գիտի՝ որտե՞ղ են ծախսվում իր վճարած հարկերը․ նա դա տեսնում է դպրոցների եւ մանկապարտեզների շինարարության մեջ, ճանապարհների շինարարության մեջ, իրենց հնարավորություններն իրացնող եւ ատեստավորվող ուսուցիչների աշխատավարձերի բարձրացման մեջ եւ բազմաթիվ այլ ոլորտներում»,- խորհրդարանում 2025 թվականի բյուջեի նախագծի քննարկումների ժամանակ հայտարարեց ԱԳ նախարար Արարատ Միրզոյանը՝ պնդելով՝ կիսում է իր կուսակիցների տեսակետը, որ հարկատուն հերոս է։
«Ես կիսում եմ այդ ձեւակերպումները»,- ասաց նա։
Արարատ Միրզոյանը հավելեց, որ ՀՀ քաղաքացին ՔՊ-ական իշխանությունից իր հաշվետվությունը կպահանջի 2026-ի ընտրություններում։ Ինքը վստահ է՝ ՔՊ-ն նորից ստանալու է քաղաքացիների քվեները։
Արարատ Միրզոյանը նաեւ հայտարարեց՝ Հայաստանն ու Ադրբեջանը խաղաղության պայմանագրի շուրջ սկսել են ավելի կառուցողական աշխատել․ 1-2 հոդվածների շուրջ աշխատանքները շարունակվում են ավելի ինտենսիվ, քան նախորդ շրջանում:
Կարդացեք նաև
«Ես կասեի` նույնիսկ ավելի համագործակցաբար, ավելի կառուցողական մթնոլորտում»,- ասաց նա՝ զգուշավոր լավատեսություն հայտնելով, որ Հայաստանն ու Ադրբեջանը շատ մոտ են՝ ունենալու խաղաղության պայմանագրի վերջնական համաձայնեցված տեքստ:
2025-ի բյուջետային ծրագրերի մասին Արարատ Միրզոյանի ներկայացումը՝ տեսանյութում
Նելլի ԳՐԻԳՈՐՅԱՆ
