«Օրերս Վրաստանի նախագահ Սալոմե Զուրաբիշվիլին խոսում էր․․․ մե՜ծ տխրությամբ ու չգիտեմ ինչով՝ պատմական Վրաստանի մասին ու գիտե՞ք ինչ էր ասում․ ուղղակի կամ անուղղակիորեն, տարածքային պահանջ էր դնում ՀՀ-ի նկատմամբ։ Ես չտեսա մի նորմալ արձագանք Հայաստանի քաղաքական շրջանակների կողմից»,- խորհրդարանում, 2025 թվականի բյուջեի նախագծի քննարկումների ժամանակ հայտարարեց նախկին ՀՀԿ-ական, այժմ «Քաղաքացիական պայմանագիր» խմբակցության պատգամավոր Շիրակ Թորոսյանը։
Հիշեցնենք, որ Վրաստանի նախագահի այդ հայտարարությանն ՀՀ ԱԳՆ-ն էլ չի արձագանքել։
Շիրակ Թորոսյանը հայտարարում է՝ Վրաստանի նախագահը ճիշտ չի արել, ոտնձգություն է փորձել ցուցաբերել ՀՀ տարածքների նկատմամբ ու վստահեցնում է՝ եթե այսօր մենք պետական քաղաքականությամբ պնդենք պատմական Հայաստանի մասին, մեր չորս հարեւաններին կստիպենք համախմբվել եւ ոչնչացնել մեր պետությունը։
Նա անդրադարձավ նաեւ հայրենասիրության, հերոսության եւ կանխատեսելիության մասին ընդդիմադիրների հայտարարություններին՝ ասելով, որ դրանք իր համար կենսակերպ են ու ինքը չի սիրում այդ զգացումները թմբկահարողներին, կարծում է, որ այդպիսով նսեմացնում են դրանք։ Այս ընկալումների տիրույթում, ըստ նրա, իրավունք չունենք հակադրել խրամատում կանգնած զինվորին եւ աշխատողին, ստեղծողին, արարողին, հարկատուին, քանի որ զինվորը պետք է սնվի, զենք ունենա ու այդ ռեսուրսները ստեղծողներ են պետք։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
