«ՀՀ Զինված ուժերը դարձել են Հնդկաստանի զինված ուժերի գովազդային վահանակը»,- խորհրդարանում, 2025 թվականի բյուջեի քննարկումների ժամանակ իր ելույթում, հայտարարեց ԱԺ «Հայաստան» խմբակցության պատգամավոր Գեղամ Մանուկյանը։ ՔՊ-ական պատգամավորները եւ ՀՀ պաշտպանության նախարար Սուրեն Պապիկյանը տեղից սկսեցին արձագանքել ընդդիմադիր պատգամավորի ելույթին։
ԱԺ նախագահ Ալեն Սիմոնյանը դիտողություն արեց իր կուսակիցներին․ «Պարոն Պապիկյան, հարգելի գործընկերներ, պարոն Սուքիասյան․․․ ՔՊ խմբակցության իմ գործընկերներ, չի կարելի տեղից խոսել։ Պարոն Մանուկյանը քաղաքական լավ ելույթ ունեցավ, չի կարելի տեղից խոսել, անկախ նրանից, թե ինքն ինչ է ասել։ Համաձայն չեք՝ ելույթ ունեցեք»։
2025 թվականի բյուջեի նախագծի քննարկումների ժամանակ, Գեղամ Մանուկյանն իր ելույթը կազմել էր նախկինում «թունդ ընդդիմադիր» պատգամավոր Նիկոլ Փաշինյանի ելույթների հիման վրա։ Նա մեջբերեց 2012 թվականից սկսած Նիկոլ Փաշինյանի ելույթները, որտեղ նա քննադատում էր կառավարությանը՝ ռազմական ոլորտի սուղ հատկացումների համար, արտաքին պարտքը մեծացնելու, հարկային քաղաքականության համար եւ այլն։ Մինչդեռ այժմ կառավարության ներկայացուցիչներն ասում են, որ արտաքին պարտքի մեծացումը ոչ մի վտանգ չի ներկայացնում։
Գեղամ Մանուկյանը Նիկոլ Փաշինյանից հետաքրքրվեց՝ ինչո՞ւ կառավարությունն իր խոստումը չի կատարում եւ ներքին ռեսուրսների վրա չի հիմնվում․ 12 միլիոն դոլար վարկն ի՞նչ է նշանակում։
Կարդացեք նաև
Հիշեցնելով Հայաստանի «պադավատապետություն» լինելու մասին Նիկոլ Փաշինյանի հայտնի հոդվածը, Գեղամ Մանուկյանը հայտարարեց, որ այժմ անգամ քաղաքապետարանի տրանսպորտի բաժնի պետն է ծառայողական մեքենայով ման գալիս։
Գեղամ Մանուկյանը հիշեց նաեւ Աննա Հակոբյանին սպասարկող 145 հազար դոլարանոց ջիպի մասին, որը պարզվում է՝ մաշվել է եւ ՊՊԾ-ն որոշել է փոխել։
Զարմացավ, որ Ռազմարդյունաբերության կոմիտեի նախագահը չի մասնակցել ռազմական ոլորտի բյուջեի փակ մասի քննարկումներին, քանի որ պետական գաղտնիքի հասանելիություն չի ունեցել։
Գեղամ Մանուկյանը վրդովվեց, որ զինվորի հագուստի մասին ամեն անգամ իր հարցերին այնպիսի դժկամությամբ են պատասխանում, կարծես այդ հագուստն իր տուն է տանում։
Մանրամասները՝ տեսանյութում
Նելլի ԳՐԻԳՈՐՅԱՆ
