Երեւան քաղաքի առաջին ատյանի ընդհանուր իրավասության քրեական դատարանի Կենտրոն նստավայրում այսօր շարունակվեց «Հյուսիսային տերեւաթափի» գործով նիստը:
Հիշեցնենք, որ ԱԱԾ համապատասխան ստորաբաժանումների կողմից իրականացված օպերատիվ-հետախուզական միջոցառումների արդյունքում ձեռք բերված փաստական տվյալներով հիմնավորվել էր, որ մի խումբ անձինք, ունենալով հակաիշխանական հայացքներ և համաձայն չլինելով Հայաստանի Հանրապետության կառավարության կողմից վարած արտաքին և ներքին քաղաքականության հետ, խմբի կազմում, 2023 թվականի մայիսին նպատակադրվել են իրականացնել անձի առողջությանը վնաս պատճառելու, կյանքից զրկելու, խոշոր չափերի գույքային վնաս պատճառելու և այլ ծանր հետևանքներ առաջացնելու վտանգով զուգորդված պայթյուններ, հանրավտանգ այլ արարքներ, զավթել և պահել շինություններ, հաղորդակցության միջոցներ, այդ կերպ ահաբեկել բնակչությանը, դրա առանձին խմբերին, կազմալուծել հանրային իշխանության մարմինների գործունեությունը, հանրային իշխանության ներկայացուցիչներին, պետական և հանրային ծառայողներին հարկադրել կատարել իրենց պահանջները, այդ թվում՝ դադարեցնել լիազորությունների հետագա իրականացումը:
Այսօրվա նիստին դատարանը հետազոտեց ապացույցները՝ վերծանվեցին գործով անցնող անձանց հեռախոսազրույցների ձայնագրությունները: Զրույցներում ինչ-որ հողատարածքի վաճառքի մասին խոսակցություն կար, գումարի փոխանցման մասին կային խոսակցություններ, հանդիպումների ժամադրություններ Ազգային ժողովրդավարական Բեւեռի գրասենյակում: Մեկ այլ զրույցում կար խոսակցություն Վարդան Ղուկասյանից (Դոգ): Գործով անցնող մեղադրյալներից Մկրտչյանի ու ինչ-որ տղամարդու միջեւ այսպիսի խոսակցություն կար:
-Դոգը, եթե ուզենա կապնվի, թող կապնվի, մեզ ֆինանսավորի, անենք էն, ինչ պետք է, ոչ թե սենց գալասավոյ էլ ուղարկել է, ասի՝ խոսալու ժամանակը չի, գործ անելու ժամանակն է: Ասի եթե ուզում ես զանգի, խոսանք:
Կարդացեք նաև
-Բայց կարող է տոչնի չես ուղարկել իրա հեռախոսի համարները, էդ որ սայտում մտնես, մեկին գրես, կգրի գիտե՞ս:
-Այ մարդ, ինքն ա ուղարկել ինձ, վայբերի համար ունի՞ ինչ-որ:
-Ինձ ինքն է ուղարկել, ասում ա ձեր մասին կարող եք մի երկու բան ասել, գրել:
-Բայց ի՞նչ ա, բան-մա՞ն ա ասել:
-Դե գրել ա, ասել ա՝ կուզենայի ձեր մասին շատ բան իմանալ: Գրեցի ինչ-որ պետք է, պատասխան չկա հլը:
-Զանգել եմ իր հեռախոսին, չի պատասխանում, վայբերով չի պատասխանում:
-Հենա հիմա ուղիղ եթերի մեջ ա:
Խմբի անդամների զրույցներում կային նաեւ ներքաղաքական կյանքին վերաբերող հատվածներ: Մկրտչյան-Գասպարյան զրույցից հատված
-Դրությունը խառն է, չէ՞:
-Ի՞նչն է խառը:
-Ընդհանրապես, երկիրը խառն է:
-Երկրագունդն է խառը:
-Արա, բայց հիմա իսկական խառը վախտ է, ինչ անես, հիմա պիտի անես:
-Դրա մաման…
Արփինե ՍԻՄՈՆՅԱՆ
