«Դատարանը եզրակացնում է, որ Ռասայական խտրականության բոլոր ձևերի վերացման մասին ռասսայական խտրականության կոնվենցիայով նախատեսված պաշտպանությունը շարունակում է գործել զինված հակամարտությունների ժամանակ։ Այդ իմաստով Կոնվենցիան ու միջազգային մարդասիրական իրավունքը փոխլրացնող են»,- քիչ առաջ Ռասսայական խտրականության բոլոր ձևերի վերացման մասին Կոնվենցիայի կիրառման վերաբերյալ Հայաստանն ընդդեմ Ադրբեջանի և Ադրբեջանն ընդդեմ Հայաստանի գործերով նախնական առարկությունների վերաբերյալ վճիռների հրապարակման ժամանակ հայտարարեց Արդարադատության միջազգային դատարանի նախագահ Նավաֆ Սալամը։
Դատարանը ձայների 16 «կողմ» և 1 «դեմ» հարաբերակցությամբ մերժեց Ադրբեջանի ներկայացրած նախնական առարկությունը դատարանի իրավազորության վերաբերյալ։ Նավաֆ Սալամը պարզաբանեց․ «Ուստի դատարանն իրավազորություն ունի քննելու ՀՀ-ի կողմից Ադրբեջանի դեմ 2021-ի սեպտեմբերի 11-ին ներկայացված գանգատը։ ՀՀ-ի պահանջները ռասսայական մոտիվացիա ունեցող պլանավորման, էթնիկ հայերի անհետացման հետ կապված տեղավորվում են Կոնվենցիայի ներքո։ Ուստի դատարանը եզրակացնում է, որ ՀՀ-ի կողմից ներկայացված պահանջները տեղավորվում են Կոնվենցիայի շրջանակի մեջ։ Ըստ այդմ՝ դատարանը եզրակացնում է, որ Ադրբեջանի ներկայացրած երկրորդ նախնական առարկությունը դատարանի իրավազորության վերաբերյալ ենթակա է մերժման»։
Ձայների 15 «կողմ» և 2 «դեմ» հարաբերակցությամբ դատարանը մերժեց նաև Ադրբեջանի կողմից ներկայացված մյուս նախնական առարկությունը։
Կարդացեք նաև
Արդարադատության միջազգային դատարանի նախագահը հայտարարեց․ «Դատարանը գտնում է, որ ՀՀ բողոքում ներկայացված գործողությունները, որոնք վերաբերում են կամայական ազատազրկմանը, հարկադիր անհետացմանը հայազգի քաղաքացիական անձանց նկատմամբ կարող են առաջացնել խտրական վերաբերմունք, որը հիմնված է էթնիկ ծագման վրա՝ մասնավորապես այն հայերի նկատմամբ, որոնք բնակվում են ԼՂ-ում»։
Ըստ դատարանի՝ ՀՀ-ի ներկայացրած պահանջները, որոնք վերաբերում են խտրականությանը, որի հիմքում էթնիկ ծագումն է, տեղավորվում են Կոնվենցիայի շրջանակի մեջ։
Նշենք, որ դատարանի վճռի տեքստը շուտով հասանելի կլինի Միջազգային դատարանի պաշտոնական կայքէջում։
Տաթև ՀԱՐՈՒԹՅՈՒՆՅԱՆ
