«Ես չեմ կարծում, որ պաշտոնական Երեւանը լռում է: Կան բանակցություններ, կան նաեւ հրապարակային հայտարարություններ»,- խորհրդարանում լրագրողների հետ ճեպազրույցում ասաց «Քաղաքացիական պայմանագիր» խմբակցության պատգամավոր Սիսակ Գաբրիելյանը՝ պատասխանելով Ադրբեջանի նախագահ Իլհամ Ալիևի հայտարարություններին ՀՀ-ի կողմից արձագանքի բացակայության վերաբերյալ հարցին: Այսօր էլ, Ադրբեջանում ընթացող COP-29-ի միջոցառումների մեկնարկին, Ալիեւը խոսել է տարածաշրջանում՝ բնապահպանական առումով Հայաստանի վտանգավորության մասին։
Սիսակ Գաբրիելյանի տպավորությամբ, Հայաստանից կա արձագանք, այդ արձագանքը գրեթե ամենօրյա ռեժիմով է․ «Այսինքն՝ եթե լինում է սպառնալիք, լինում է նաեւ դրան պատասխան։ Եվ ոչ միայն մեր կողմից, այլեւ մեր միջազգային գործընկերների կողմից։ Մենք ամեն ինչ պետք է անենք, որպեսզի հասնենք խաղաղության, որովհետեւ այլ տարբերակ չկա, զարգացման համար այլ տարբերակ չկա: Օրինակ, այս տարի մինչեւ այս պահը, եթե չեմ սխալվում, սահմանային միջադեպ չի արձանագրվել: Խոսեք գործարարների հետ, խոսեք այն մարդկանց հետ, որոնք պլանավորում են այս երկրում երեխաներ ունենալ, ընտանիք կազմել, չափազանց կարեւոր է, որպեսզի երկրում լինի խաղաղություն։ Այսինքն՝ առանց դրա չկա կայուն եւ երկարատեւ զարգացում։ Սա մեր ծրագիրն է: Մեր նպատակը դա է, որ ամեն ինչ անենք, որ հասնենք դրան»։
Նելլի ԳՐԻԳՈՐՅԱՆ
Կարդացեք նաև
Լուսանկարը՝ ադրբեջանագետ Տաթեւ Հայրապետյանի տելեգրամյան ալիքից
