Ես ՀՀ պետական բյուջեի հաշվին երբեք, որեւէ ակումբային խաղերի չեմ գնացել, մեկնել եմ իմ միջոցներով․ խորհրդարանում լրագրողների հետ զրույցում ասաց ՔՊ խմբակցության պատգամավոր Սիսակ Գաբրիելյանը։
Հիշեցնենք, մամուլում հրապարակումներ եղան, որ նա՝ Նիկոլ Փաշինյանի աներորդի, ՔՊ-ական մեկ այլ պատգամավոր Հրաչյա Հակոբյանի հետ մեկնել է Անգլիա՝ ֆուտբոլ նայելու։
Լրագրողներից մեկը հետաքրքրվեց՝ իր աշխատավարձը բավականացնո՞ւմ է հիփոթեքային վարկ վճարելու, ապրելու եւ նման հաճույքներ իրեն թույլ տալու համար։ Սիսակ Գաբրիելյանը պատասխանեց՝ իբրեւ ԱԺ համապատասխան հանձնաժողովի նախագահ, երբեմն նաեւ Հայաստանի հավաքականի հետ է մեկնում, ակումբներից է հրավերքներ ստանում։
Խոսելով հայկական ֆուտբոլի մասին, ասաց, որ ֆուտբոլն անշնորհակալ գործ է, այդտեղ պարտություններ միշտ կան։ Իր հետագա համեմատություններում՝ Սիսակ Գաբրիելյանը կարծիք հայտնեց՝ Վրաստանը շատ է ցանկանում, որ իր ակումբային ֆուտբոլը գրանցի հայկական ակումբային ֆուտբոլի արդյունքները․ «Ֆուտբոլը միայն Հայաստանի ազգային հավաքականը չէ»։
Կարդացեք նաև
Պատասխանելով ՀՖՖ նախագահ Արմեն Մելիքբեկյանի հրաժարականի պահանջի մասին հարցին էլ, Սիսակ Գաբրիելյանն ասաց, որ այդ պահանջը ներկայացնող ակումբներն ազատ են:
Նա չարձագանքեց հարցին, որ ժամանակին ՀՖՖ նախագահ Ռուբեն Հայրապետյանին չներվեց հավաքականի պարտությունը․ «Հիմա դուք ի՞նչ եք ուզում, որ անեմ, գնամ շուխո՞ւր անեմ։ Ես ոչ ոքի չեմ ներել․․․»։
Նա հայտարարեց՝ եթե քաղաքական միջամտություն եղավ, ընդհանրապես ֆուտբոլ չենք ունենա ու վստահեցրեց՝ Արմեն Մելիքբեկյանը ապաքաղաքական ու ապակուսակցական անձ է: Ասաց, որ Ֆուտբոլի ֆեդերացիան ունի իր զարգացման ծրագիրը՝ մինչեւ 2026 թվականը ու հայտարարեց, որ Հայաստանի ակումբային ֆուտբոլը մեծ հաջողություններ ունի։ ՔՊ-ական պատգամավորը նաեւ ասաց, որ անձամբ խոսել է Արմեն Մելիքբեկյանի հետ, վերջինս ասել է՝ իրեն էլ չեն գոհացնում հավաքականի արդյունքները:
«Ի՞նչ անենք, հավաքականի համար ասենք՝ հրաժարական տո՞ւր, ակումբայինի համար ասենք՝ արի՞»,- տարակուսեց Սիսակ Գաբրիելյանը՝ հայտարարելով, որ երկու տարի առաջ քաղաքական որոշում է կայացվել, որ ՀՖՖ-ում որեւէ քաղաքական ներկայություն չպետք է լինի։
Նելլի ԳՐԻԳՈՐՅԱՆ
