2025 թվականին պետական պարտքի սպասարկման համար ծախսվելու է 394 միլիարդ դրամ․ այսօր խորհրդարանում 2025 թվականի բյուջեի նախագծի քննարկումների ժամանակ նկատեց «Հայաստան» խմբակցության պատգամավոր Արծվիկ Մինասյանը։
Նա պատկերավոր դարձրեց իր խոսքը՝ ՀՀ յուրաքանչյուր քաղաքացի՝ նորածնից մինչեւ խոր ծերության մեջ գտնվող անձ, շուրջ 12 հազար դրամի իր բարեկեցությունից պետք է հրաժարվի, պետական պարտքի սպասարկման համար եւ նախարար Վահե Հովհաննիսյանից հետաքրքրվեց՝ ի՞նչ պետական ծրագրեր կան, որոնք պետական պարտքի սպասարկմանն են ուղղված։
Նախարարը պատասխանեց՝ ԿԲ-ի հետ վերլուծություններ են արել, արդյունքները քննարկվում են։ Նաեւ ասաց, որ ներքին եւ արտաքին ֆինանսավորման հաշվին պետական պարտքի տոկոսը նվազել է։
Արծվիկ Մինասյանը նաեւ նախարարին հորդորեց անկեղծ լինել եւ ասել, որ այն դպրոցներն ու մանկապարտեզները, որոնք կառավարությունը կառուցում է եւ գովազդում, դրանք պետական պարտքի հաշվին եւ բոլորի ուսերին են։ Վահե Հովհաննիսյանը հակադարձեց՝ ասելով, որ միայն մեկ նման ծրագիր կա՝ Ասիական զարգացման բանկի հետ ու հավելեց, որ դա էլ ներդրում է մեր ապագայի մեջ։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
