Ադրբեջանի քաղաքականությունը շատ հստակ էր, շատ համակարգված ու ամբողջությամբ ուղղված էր նրան, որ անհնարին դարձներ արցախահայերի բնակությունն Արցախում․ այսօր «Ինչո՞ւ Լեռնային Ղարաբաղում հայեր չկան» փաստահավաք զեկույցի ներկայացման ժամանակ իր ելույթում ասաց Հելսինկյան քաղաքացիական ասամբլեայի Վանաձորի գրասենյակի ծրագրերի ղեկավար Վարդինե Գրիգորյանը։
Ըստ բանախոսի, աստիճանաբար բարդացնելով կյանքը, անհնարին դարձնելով կյանքը՝ Ադրբեջանը նպատակ ուներ հասցնել մի իրավիճակի, որ մարդիկ այլընտրանք չեն տեսնի, քան լքել տարածքը։
Զեկույցի նախապատրաստման համար հարցազրույցները ցույց են տվել, որ 2020-ի պատերազմից հետո, ռուս խաղաղապահների ներկայությունն էր իրավիճակի զսպող հանգամանք, դրա համար շատերը վերադարձան Արցախ, սկսեցին վերականգնել ու վերանորոգել իրենց կյանքն այն տարածքներում, որոնք հայկական իշխանության եւ ռուս խաղաղապահների վերահսկման ներքո էին։
Ըստ Վարդինե Գրիգորյանի, հարցումներին՝ եղե՞լ են հնարավորություններ կամ փորձեր արվե՞լ են վերադառնալ այն տարածքներ, որոնք անցել էին ադրբեջանական վերահսկողության ներքո, մարդիկ պատասխանել են, որ նման դեպքերում առաջին կանխարգելումները եղել են հենց ռուս խաղաղապահների կողմից, որոնք ասել են, որ չեն կարող ապահովել իրենց անվտանգությունը։
Կարդացեք նաև
Բանախոսը նաեւ տեղեկացրեց, որ խաղաղապահներն իրենց հետ զրույցներում ասել են, թե որոշակի տարածքներում՝ իրենց հետ համաձայնեցված, արցախցիները գյուղատնտեսական աշխատանքներ են իրականացնում, մինչդեռ հաղորդագրությունների ուսումնասիրություններն էլ ցույց են տվել, որ այդ տարածքներում հրադադարի ռեժիմի խախտումներ են եղել պարբերաբար։ Այսինքն, թեեւ, համաձայնեցված է եղել, բայց միեւնույն է՝ հրադադարը խախտվել է։
Մանրամասները՝ տեսանյութում
Նելլի ԳՐԻԳՈՐՅԱՆ
