«Ավանսեն» ֆրանկոֆոն երիտասարդական թատերական ասոցիացիայի նախաձեռնությամբ նոյեմբերի 4-7-ը Երևանում անցկացվել են Ֆրանկոֆոն թատերական ամենամյա հանդիպումները, որոնց շրջանակում՝ միջազգային գիտաժողով, ներկայացումներ, թատերական ընթերցումներ, թատերկի հայերեն հրատարակության շնորհանդեսը։
6-րդ թատերական հանդիպումները՝ «Էոժեն Իոնեսկո․ աբսուրդի վերժամանակյան երևույթը» խորագրի ներքո էին՝ նվիրված ռումինացի ֆրանսագիր թատերագրին։ Վեց տարի շարունակ այս նախագիծը ֆրանսագիր թատերգուների երկերի միջոցով հետամուտ է Հայաստանում ժամանակակից ֆրանսագիր թատերարվեստի տարածմանը:
«Ժամանակատարածական եւ հասարակական դրսևորումները Էժեն Իոնեսկոյի արվեստի և փիլիսոփայության մեջ» խորագրով միջազգային գիտաժողովին զեկույցներով հանդես եկան հայաստանյան բուհերի, Ռումիներենի ինստիտուտի, Բուխարեստի համալսարանի գրականության ֆակուլտետի, Ի․Լ․ Կարաջալեի անվան թատրոնի և կինոյի ազգային համալսարանի գրականագետներ, թատերագետներ, լեզվաբաններ։
Հավելենք, որ նախագիծն իրականություն է Ֆրանկոֆոնիայի միջազգային կազմակերպության (OIF), Հայաստանում Ռումինիայի դեսպանության, Հայաստանի ֆրանսիական ինստիտուտի, Վ. Բրյուսովի անվան պետական համալսարանի, Հայաստանում ֆրանսիական համալսարանի, Երևանի թատրոնի և կինոյի պետական ինստիտուտի, «Մհեր Մկրտչյան» արտիստական թատրոնի եւ «Անկյունաքար» հրատարակչության աջակցությամբ: Ի դեպ, միջոցառման առիթով Հայաստան էր ժամանել Ֆրանկոֆոնիայի միջազգային կազմակերպության Կենտրոնական և Արևելյան Եվրոպայի գրասենյակի ներկայացուցիչ Էրիկ Պոպպը։
Կարդացեք նաև
«Ամփոփելով Հայաստանում 6-րդ ֆրանկոֆոն թատերական հանդիպումները՝ մեծ ուրախությամբ նշում եմ, որ հաջորդ տարի եւս այն կայանալու է, արդեն նվիրված կլինի ռումինացի արմատներով ֆրանսագիր ճանաչված հեղինակ Մատեի Վիշնեկին: 7-րդ թատերական հանդիպումներին կթարգմանվեն և կհրատարակվեն նրա պիեսները, նորից հայ հանդիսատեսին կներկայացվի թատերական հարուստ ծրագիր»,-մեզ հետ զրույցում նշեց նախագծի համահիմնադիր, Սորբոնի համալսարանի դոկտոր Լուսինե Աբգարյանը:
Նախագծի համահիմնադիր, բանասիրական գիտությունների թեկնածու, դոցենտ Անի Ջանիկյանի խոսքով, այս տարվա թատերական հանդիպումները եզրափակվել են հրաշալի ներկայացմամբ. «Հայ հանդիսատեսին «Հերատ երգչուհին» ներկայացմամբ հիացրեց Սուչավայի Մատեի Վիշնիեկի անվան քաղաքային թատրոնը: Աբսուրդի մթնոլորտով, հրաշալի դերասանախաղով ու ինքնատիպ ռեժիսորական լուծումներով հագեցած ներկայացում էր»:
Նախագծի հանրային կապերի պատասխանատու Վովա Արզումանյանն էլ հետեւյալը նշեց. «Նախագիծը հարթակ է տրամադրում նաև երիտասարդ արտիստներին, որոնք իրենց մտահղացումներն արդեն արվեստի գործի վերածած ներկայացնում են ոչ միայն տեղի հանդիսատեսին, այլև արտերկրից ժամանած հյուրերին: Սա նաև նոր կապեր ձեռք բերելու, ամրապնդելու հրաշալի հնարավորություն է: Օրինակ Գյումրու երիտասարդական թատերախումբը, որը գործում է մի խումբ շնորհալի արտիստների եռանդի շնորհիվ, ներկայացավ «Հերատ երգչուհին» թատերկի թատերականացված ընթերցմամբ, որը, անշուշտ, կարող է պատճառ հանդիսանալ արդեն մեծ բեմում ներկայացնելու համար»:
Անի ՍԱՀԱԿՅԱՆ
